Santiago de Compostela, a 9 de Outubro de 2016.
Duelo de dinámicas. Por unha banda, un Compos que só coñece a vitoria no seu feudo, e polo outro, un Racing Club Vilalbés que aínda non perdeu no que vai de campionato, e que está situado no alto da clasificación con 19 puntos.
Un choque que enfrontará a dous conxuntos opostos, xa que mentres a SD é un equipo totalmente novo, no que apenas seguen tres xogadores do ano pasado, o Vilalbés mantén o bloque do curso anterior, no que remataron en quinta posición en Terceira División, con algunha incorporación como a de Gerardo, un dianteiro que leva seis goles e que Yago Iglesias considera como “un dos dous ou tres mellores xogadores da categoría”.
Por tanto, o técnico riveirense, que non se cansa de explicar que o seu é un proxecto a medio ou longo prazo, asegura que o modelo do Vilalbés “é un claro reflexo do que pode ser o Compostela”, se non en xogo, si nos resultados que trae a paciencia por un proxecto.
Así, o conxunto lucense, “un equipo moi traballado, defensivamente moi rochoso e que ademais ten gol”, está asentado na primeira posición, un lugar que non sorprende ao Yago, quen ten moi estudado ao rival deste domingo, “xa que o ano pasado colliamos os seus rivais e vin moitos partidos seus”. Ademais, o Compos conta tamén co coñecemento de Make, quen xogou moitos anos alí e coñece perfectamente o que quere o adestrador do Vilalbés.
En base a este estudo do rival, e ás calidades potenciais do seu equipo, Yago e os seus mozos esperan cortar a xeira do líder e seguir escalando na clasificación. A pesar de que non poderá contar con dous referentes en ataque como Mitogo, que está convocado coa súa selección nacional, e Martín, cunha lesión muscular, agardan manter o idilio con San Lázaro.
Estas baixas, obrigan ao corpo técnico santiagués a “cambiar o perfil do xogador para esa zona”. Outros xogadores terán a súa oportunidade, polo que estarán extramotivados. En palabras de Yago, “ao final, a capacidade dun equipo de ser competitivo marcaraa a calidade e a profesionalidade da xente que menos xoga”.
Con novidades ou sen elas, o Compos buscará tres puntos máis que o aúpen aos postos nobres da clasificación.
