[cs_video column_size=”1/1″ video_url=”https://youtu.be/Rv4odhBmTSg” video_width=”500″ video_height=”250″][/cs_video]
Santiago de Compostela, a 15 de Outubro de 2016.
Por segunda xornada consecutiva, San Lázaro será a sede do partido da SD Compostela. O conxunto santiagués enfrontarase a un dos candidatos ao ascenso, o Bergantiños, co claro obxectivo de manter a xeira de vitorias que leva no seu campo, catro de catro.
Despois de xogar contra o líder, e gañarlle, o Compos terá outro duro rival. O Bergantiños, situado no sétimo posto da táboa, con tan só un punto menos que os branquiazuis, é un dos claros favoritos para quedar entre os catro primeiros. Os carballeses son, en palabras de Yago Iglesias, “un equipo que se reforzou moi ben, con xogadores con moita experiencia, e que lle gusta ter o balón”.
O técnico riveirense destaca, por encima de todos, a dous xogadores do seu rival. A Rodri, “un nove referencia, rápido, que haberá que atar moi en curto”, autor o ano pasado de 13 goles no CD Barco, e a Roberto Piñeiro. Aínda así, tamén quere ter en conta a outros futbolistas como Iago Blanco e Álex Pérez, que levan tres goles respectivamente no que vai de campionato. Parar a estes xogadores, e as “entradas desde segunda liña” será importante para lograr un bo resultado.
Para conseguir esa quinta vitoria en San Lázaro, e do curso, Yago Iglesias deberá realizar outra vez variacións no seu once inicial. “Cabrejo e Martín, por unha sobrecarga muscular, e Samu, por unha contusión no dedo gordo do pé” son baixas seguras para o choque. Tres xogadores moi importantes dentro do equipo, e que verán desde a bancada o partido deste domingo.
Outros membros do plantel como Rubén, Mon, Ube ou Cardeñosa, poden ter a oportunidade de adentrarse no once, aproveitando estas baixas. No caso do primeiro, xa disputou o domingo pasado o seu primeiro partido de titular, e podería afianzarse na posición de banda, xa que ademais Mitogo, que chegou este xoves do seu compromiso internacional con Guinea Ecuatorial, está a recuperar a forma, despois dunha viaxe tan longa.
Xogue quen xogue, será un partido de ti a ti, xa que segundo Yago, “o Bergan é un perfil de equipo que lle gusta ter o balón”. Un selo moi marcado polo seu técnico Miguel Figueira, que o ano pasado estaba no Arteixo.
Quen consiga dominar co balón, terá unha oportunidade maior de sacar os tres puntos. Esperemos que sexa o Compos, e que o ritmo non pare en San Lázaro.
