-
Os branquiazuis superaron por 0-1 ao Vimenor, con gol de Fer Cano, e xa están en 1/8 da Copa Federación
Santiago de Compostela, 25 de setembro de 2024
A SD Compostela rompeu co seu maleficio de inicio de ano superando a rolda de 1/16 de final da Copa Federación. Os nosos conseguiron a primeira vitoria da tempada en Cantabria, contra o Vimenor, grazas ao solitario gol de Fer Cano á media hora de xogo. Agora, en oitavos, mediranse ao Lealtad, o vindeiro mércores, en terras asturianas.
O primeiro triunfo branquiazul chegou nun partido no que os nosos mostraron boas sensacións, continuando a liña do encontro contra o Langreo, e máis contundencia nas áreas. Atrás, deixaron a portaría a cero por primeira vez na campaña, no que era o debut de Iago Domínguez baixo paus. Mentres tanto, arriba, a pesar de non aproveitar todas as ocasións xeradas, o gol marcado foi suficiente para conseguir o pase á seguinte rolda da Copa Federación.
O tanto de Fer Cano, primeiro para el coa camiseta do Compos, chegou nunha acción de córner, aproveitando o mediapunta un balón morto na área pequena. Na acción, rematou Kike no segundo pau, tocou Pablo Crespo no primeiro e caeulle a Fer, no centro, para, virándose, fusilar ao fondo da rede.
Do mesmo xeito, o duelo contra o Vimenor de Copa Federación tamén nos deixou os debuts na campaña de, ademais de Iago, Trasi e Balsa, quen callaron unha boa actuación.
Esta vitoria supón un golpe anímico para os branquiazuis que xa encaran unha nova xornada de liga, este domingo, ás 17.00 horas, contra o Marino de Luanco en Miramar. Un duelo no que buscarán o primeiro triunfo na competición ligueira.
FICHA TÉCNICA
VIMENOR CF: Fonso Liaño; Fran de Cos, Ruizca, D. Pelayo, Joan Martín; Dosal (Iván, min. 63), Jaime; Bruno Pascua (Sergio, min. 70), S. Pelayo (S. Rodríguez, min. 83), Laro Setién (A. Puente, min. 83); Vitali (Palazuelos, min. 63).
SD COMPOSTELA: Iago Domínguez; Óscar Gil (Santi de Prado, min. 55), Kike, David Soto, Pablo Crespo, Manu Rivas (Ocaña, min. 55); Álvaro Casas, Trasi; Fer Cano (Hugo Matos, min. 83), Giuliano (Samu, min. 69) e Landeira (Balsa, min. 83).
GOLES: 0-1: Fer Cano, min. 30.
ÁRBITRO: Barrio Salas (Áraba). Amoestou a Ruizca, D. Pelayo, Fran de Cos, Laro Setién e A. Puente, polo Vimenor; e a Álvaro Casas e Santi de Prado, pola SD Compostela.
INCIDENCIAS: Campo de Fútbol A Vidreira (Vioño de Piélagos). Dezaseisavos de final da Copa Federación.
