-
Os nosos viron como a súa renda se escapaba nos últimos minutos tras unha gran segunda parte
As Somozas, 26 de abril de 2026
Tivo o Compos a vitoria en As Somozas pero, como noutras xornadas, o triunfo escapouse nos últimos minutos. Tras unha boa segunda parte e pórse por diante no marcador, os nosos non puideron aguantar a renda e viron como o cadro local empataba desde os once metros. 1-1 final.
O duelo no Manuel Candocia estivo dominado de principio a fin por un Compos que buscou con afán a portaría de Iago. Na primeira, tívoas, sobre todo, nas botas de Cañi, pero sería na segunda parte cando comezaron a chegar as ocasións a varrer.
Dous mans a mans de Diego Rodríguez e Antón Guisande, ambos sacados por Iago, e un centro de Cañi, despexado sobre a liña por Dopico con Charly relambéndose para empuxala, foron o preludio do gol branquiazul. Cañi lanzou un córner que Antón Guisande cazou coa cabeza para aloxalo na rede. 0-1.
O máis difícil logrouse e puido ser mellor, porque dous minutos máis tarde, Iago facía un penalti sobre Charly. Encargouse Cañi de lanzalo, como noutras xornadas, pero Iago aguantou no medio e despexou o lanzamento do noso extremo.
Grazas a esa parada, o Somozas seguía vivo e o aproveitouno no oitenta. Nun rexeite dun córner, a pelota pegou na man de Diego Uzal e o árbitro sinalou penalti. Cambón, desde os once metros, enganou a Cobo e puxo o empate.
Quedaban dez minutos e o Compos foise con todo arriba, cargando a área con centros continuos, pero non atoparon bos remates.
Así, con este empate, o Compos queda segundo, a dous puntos do Arousa, dependendo dun erro para poder asaltar a praza de ascenso directo.
FICHA TÉCNICA
1 – UD SOMOZAS: Iago Domínguez; Asier, Dopico, Mariña, Cabarcos; Fanego, Bruno, Óscar, Iñaki; Cambón e Jose (Pablo, min.61).
1 – SD COMPOSTELA: Álex Cobo; Diego Rodríguez, Diego Uzal, Pablo Crespo, Damián Noya (Aarón Martínez, min.86); Samu (David Rosón, min.73), Unai (Parapar, min.86); Armental, Antón Guisande, Cañi (Goris, min.73); e Charly (Maceira, min.73)
GOLES: 0-1: Antón Guisande, min.61; 1-1: Cambón (p.), min.81.
ÁRBITRO: Pedro Castro (Lugo). Amoestou a Iñaki e Iago Domínguez, polo Somozas; e a Secho, Samu e Antón Guisande, polo Compos.
INCIDENCIAS: Campo Municipal Manuel Candocia (As Somozas). Xornada 32 de Liga do Grupo 1 da Terceira RFEF disputado cunha gran presenza de afeccionados do Compos na bancada.
