A pesar do estreo de Fredi no banco santiagués, a S.D. Compostela segue sen atopar o camiño do gol. O desacerto e a escasa fortuna volveron facer mella novamente na Esedé, prolongando unha dinámica negativa que precisa canto antes un xiro radical. O partido ante o Peña Sport presentábase como unha boa oportunidade para levarse os tres puntos ante un rival directo, pero o conxunto local logrou deixar a vitoria na seu feudo grazas a un gol de Cardo no minuto 92.
Ao pouco de empezar o partido os reflexos de Pato salvaron ao Compostela de encaixar o primeiro tanto nunha clara ocasión do Peña Sport; acción que servía de aviso para os homes de Fredi Álvarez, coñecedores de que non llo ían a poñer nada fácil en Tafalla. Durante a primeira metade o Compostela logrou controlar o partido, evitando accións de perigo na súa área. Mentres, en ataque, a Esedé dispuxo de dúas boas accións para marcar; un remate de Orbegozo e outro de Bicho de cabeza, pero o escaso acerto provocou que ambos equipos marchasen ao descanso sen goles no marcador.
Na reanudación a S.D. Compostela tivo os seus mellores minutos e dispuxo dalgunha ocasión para marcar; pero tamén o Peña Sport empezou a adiantar liñas buscando os tres puntos. Eran minutos de intercambio, sen claro dominio, e onde os dous porteiros -Pato e Tanis, -o porteiro do Pena Sport-, lograban manter o choque sen goles grazas ás súas boas intervencións.
Joaquín tivo unha boa oportunidade cando se facía cun rexeite na área tras unha boa acción pola banda dereita, pero o seu remate non viu o camiño do gol. Todo facía indicar que Fredi debutaría cun empate en Tafalla pero no tempo de prolongación, no último minuto do engadido, chegaba o queixume para a S.D. Compostela. O Peña Sport pechaba o partido cun 1- 0 tras un centro desde a banda dereita que remataba de cabeza Cardo. Un tanto que outorgaba os tres puntos aos de Tafalla e deixaba á Esedé desmoralizada ao ver que cada xornada a brecha cara á permanencia agrándase.
Con todo aínda quedan moitos partidos por disputar; hai marxe de manobra, a segunda volta non fixo máis que comezar. Polo de súpeto a próxima cita será o sábado que vén en San Lázaro ás 18:00h e ante o Izarra.
