- O cadete e o infantil A foron os triunfadores do fin de semana.
Santiago de Compostela, a 20 de Setembro de 2016.
Tras unha mala xornada, na que o Cadete fora o único equipo que gañou, as categorías inferiores da SD Compostela recuperan a boa dinámica, nunha fin de semana na que houbo dous triunfos, dous empates e unha derrota.
Os xuvenís de Liga Nacional seguen sen coñecer a vitoria. Os pupilos de Vecho, empataron na súa visita ao campo dos Escolapios para enfrontarse ao Calasancio. Tras a súa derrota contra o Coruxo na primeira xornada de Liga, o xuvenil suma un punto tras igualar a un gol, nun partido no que se puxeron por diante cedo.
No minuto 15 da primeira parte, José Ricardo Loureiro anotaba o gol do Compos. Con todo, xa na segunda parte, Santiago Real poñía as táboas no marcador, evitando así a primeira vitoria dos santiagueses.
Pola súa banda, o Xuvenil B poñía a nota negativa da xornada. A pesar de que xogaba en casa, caeu derrotado contra un Conxo B que foi moi superior durante todo o partido.
Con dobrete de Jorge Salgado e outro gol de Manuel González, o Conxo púxose 0-3, facendo inútil o gol de Anxo Agra no 81.
En canto ao cadete, segue o seu bo ritmo e suma a súa terceira vitoria da tempada en tres partidos, esta vez contra o Amio. O Compos gañou por un gol a tres con goles de Alejandro Outeiral, Ignacio Pereiro e Juan Mallo. Con esta vitoria, o equipo branquiazul ascende á cabeza da táboa, empatado con outros catro equipos.
O segundo triunfo do fin de semana chegou do Infantil A. Os goles de Iago Fernández e Adrián Álvarez foron suficientes para lograr a vitoria por 0-2 e situarse sétimo na clasificación.
Por último, o Infantil B empatou a cero contra o Cacheiras, no seu debut na Segunda Autonómica Infantil.
