- O embaixador de Uruguai en España, acompañado doutros mandatarios do consulado e da embaixada, coñeceron de primeira man aos xogadores, corpo técnico, directivos e instalacións compostelás.
Santiago de Compostela, a 23 de Setembro de 2016.
San Lázaro recibiu na xornada de onte, a honrosa visita do embaixador de Uruguai en España, Francisco Bustillo. O mandatario fíxoo acompañado de Ana Teresa Ayala, segunda da embaixada, María del Huerto Areaus, cónsul de Uruguai en Galicia, e Fernando Pérez, oficial da chancelería.
Os catro foron recibidos polo presidente, Antonio Quinteiro, ás 18:30 no exterior do Estadio Municipal de San Lázaro. O máximo mandatario da SD, primeiro presentoulles aos directivos do club e levounos a coñecer aos xogadores e corpo técnico do plantel, que xusto acababan o adestramento nese instante.
Francisco Bustillo quixo desexarlle toda a sorte do mundo ao Compostela, ademais de dicir, en tono irónico, que ía mover fíos para traer a Luís Suárez ao Compos e así loitar por chegar á Primeira División Española.
Logo de coñecer a todos os integrantes, sacáronse unha foto de grupo para inmortalizar o momento e Francisco aproveitou tamén para conversar co adestrador Yago Iglesias e con Gonzalo García Recoba, xogador nacido en Uruguai pero afincado en Galicia, e que está adestrando estes días co Compos, mentres agarda coller a viaxe que o leve ao seu próximo destino.
Logo de que os xogadores se retirasen ás duchas, os mandatarios acercáronse a coñecer por dentro o Estadio de San Lázaro, onde lles recordaron os grandes momentos vividos no campo. Foi sobre todo, Javier Bellido, quen levou a voz cantante, falando daquelas experiencias que el viviu de primeira man.
A continuación, subiron á sala de trofeos da SD, situada nas oficinas do club, onde contemplaron as fotografías e os trofeos que rememoran a historia do conxunto santiagués.
Por último, para terminar a visita, Antonio Quinteiro fíxolle entrega a Francisco Bustillo das camisetas local e visitante deste ano, firmadas por todos os xogadores, e co seu nome e o 24 nas costas, polo día no que se inaugurou San Lázaro.
Ademais, tanto a Francisco, como ao resto da comitiva, entregóuselles un carné de socio honorífico, un libro do 50 aniversario, un pin co escudo da SD e un banderín do equipo.
Foi o punto e seguido do acto, xa que Francisco Bustillo asegurou que quere volver a San Lázaro, pero esta vez para gozar dun partido no estadio.
