[cs_video column_size=”1/1″ video_url=”https://www.youtube.com/watch?v=vURs82ct4-A” video_width=”500″ video_height=”250″][/cs_video]
- A SD tratará este domingo de gañar o seu terceiro encontro consecutivo en San Lázaro contra o As Pontes.
Santiago de Compostela, a 23 de Setembro de 2016.
Volta a San Lázaro. Despois dunha derrota en terras lucenses contra o Castro, o Compos regresa ao seu feudo coa dobre intención de manter a imbatibilidade en casa e, á vez, recuperar as boas sensacións.
Para iso, o rival será o As Pontes, un conxunto que coñecen ben, xa que se enfrontaron en Copa Federación, nun partido que acabou en empate e posterior vitoria pontesa nos penaltis, despois de que o Compos desaproveitase numerosas ocasións.
“Teñen tres/catro xogadores veteranos na categoría e despois xente rápida arriba. O seu adestrador estaba xa o ano pasado, de segundo, e son continuistas coa súa idea de tratar ben o balón e xerar ocasións a partir de aí”, comentou Yago Iglesias en rolda de prensa.
Con moitas caras novas, como o Compos, o As Pontes comezou a tempada con dúbidas. Aínda non sumou ningunha vitoria, polo que está situado no pozo da clasificación. Este mal comezo xéralle a dúbida a Yago de como virán enfrontarse a eles. “Veremos se chegan a San Lázaro coa idea de tratar de xogar o balón ou con outro rexistro”, afirma.
Con todo, o técnico ten a firme idea de que o Compostela primeiro debe mirarse a si mesmo, conseguir que sexa o rival o que “lle preocupe máis o que fagamos nós, que ao revés”. Quere imprimir aos xogadores “esa personalidade, ese mala leche que nos falta”. Cre que lles está penalizando a presión de ser o Compostela. “Son xogadores que están a defender unha camiseta que ten un peso encima e iso costa máis que vestir outras camisetas. Tentamos que se solten, que sexan eles mesmos, que o peso do escudo non beneficie máis ao rival que a nós. Debe ser unha satisfacción vestir esta camiseta, que sexan os demais os que teman xogar contra nós”, afirma rotundamente.
Para conseguilo, “lograr o empaque necesario para pechar os partidos” faise vital, xa que Yago considera que “o equipo ten un perfil de filial, pero sen selo”. Moita xente nova á que tenta transmitir “esa personalidade , esa picardía e ambición, para que cando metas o primeiro, ir a por o segundo”.
Nestas situacións, os veteranos do plantel deben impoñerse, algo que segundo o adestrador “xa fan, pero é un proceso que leva o seu tempo, aínda que tentaremos que sexa o menos posible”. A súa sensación, como a de todo o plantel é que “se gañamos dous partidos reverteremos a situación, pero para iso primeiro hai que gañar o primeiro”, argumenta.
O técnico espera que esta fin de semana chegue a primeira, optimista despois de ver que “o equipo está enchufado, con ganas, desexosos de que chegue o domingo, para volver repetir a cara que se nos viu nos partidos de casa”.
Aínda así, a competición é moi longa e Yago cre que agora mesmo “hai que centrarse en que o equipo vaia mellorando semana a semana”, sen perder de vista tampouco os resultados. “Debemos paliar as poucas cousas que non facemos tan ben e que nos están penalizando moito, para que semana a semana melloremos”.
Que mellor forma de arranxar eses problemas, que coa terceira vitoria seguida en casa. San Lázaro debe seguir sendo un fortín. Non hai dous sen tres.
