-O Compos empata no campo do Dubra, logo de que os locais marcasen na última xogada do encontro.
Santiago de Compostela, a 3 de Outubro de 2016.
A nada. A menos de 30 segundos. A iso estivo a primeira vitoria do Compos a domicilio. Un gol de Eloy na última xogada do encontro impediu a fazaña.
O Compos ía mentalizado do que quería conseguir. Sabía que era unha gran oportunidade e quería aproveitala. Por iso, saíu ao encontro moi enchufado. Con cambios no once para contrarrestar o poderío por arriba dos de Chus Baleato, a SD parecía funcionar. Seus foron os primeiros achegamentos e seu foi o primeiro gol do partido, obra de Tomás Abelleira no minuto 24.
O tanto chegou logo dunha xogada por banda que acabou cun centro á área mal despexado pola defensa. O balón quedou morto na frontal para Samu, que cedeu o coiro para Tomás, quen tras regatear ao defensa co control, bateu ao meta local de tiro cruzado coa zurda.
Volvía repetirse a historia, de novo estaban por diante nun partido de visitante e, a diferenza dos anteriores, a SD soubo aguantar a vantaxe ata o descanso, aínda que non sen sufrir.
Primeiro Eloy quedou só nun man a man con Lucas, pero tras regatealo, mandou o balón ao lateral de rede. E despois foi Bendaña quen puxo a proba ao porteiro santiagués, cun disparo desde 30 metros que tivo que despexar a córner o porteiro.
Con todo, o que tivo a última ocasión antes do intermedio foi o Compos. Mitogo quedou só na área e mandou o balón á rede, pero o árbitro sinalou un fóra de xogo máis que dubidoso.
Con todo, á volta dos vestiarios, o escenario cambiou. O Dubra puxo unha marcha máis e como premio chegou o gol do empate.
Nunha falta colgada á área desde o mediocampo, o balón quedou solto nos pés de Eloy que centrou raso e Cholo empuxouna á rede.
O tanto animou aínda máis aos locais, mentres que o Compos quedou moi tocado. Pasou dez minutos de sufrimento, nos que o Dubra primeiro cun disparo desde a frontal e logo cun tiro frouxo de Gonzalo na interior da área pequena, púidose adiantar.
Non o fixo e Yago rapidamente realizou trocos. Entraron Diego Rey e Santi Gegunde por Martín e David Nogueira, e o partido recobrou a igualdade. Primeiro tentouno o Dubra, con dous remates de cabeza de Eloy, só na área, que se foron ás mans de Lucas. E despois foi o Compos o que rondou a área local con tres achegamentos moi perigosos.
No 86, Tomás estaba preto de marcar, despois de que o seu disparo tocase nun defensa e fose a córner por pouco. E no seguinte minuto Santi deixaba primeiro un pase atrás que non atopou rematador e a continuación o seu tiro foise ás mans de Brais.
Tanto foi o cántaro á fonte, que ao final rompeu. No 91, Mitogo regateaba ao porteiro, tras unha mala saída de este, e o seu centro era empuxado por Santi a portería baleira. Parecía que por fin chegaría a vitoria tan desexada, pero o destino quixo que non fose así.
No 94, noutra falta desde o mediocampo, o balón quedou morto na área e Eloy aproveitaba o barullo para meter o gol do empate na última xogada do partido. Lucas pediu falta, pero o árbitro deu gol válido e sinalou o final do choque.
Non puido ser, pero o empate tampouco é mal resultado, xa que o Compos ascende un lugar na clasificación e colócase a dous puntos do playoff. Tocará facer bo o empate, o domingo que vén en San Lázaro contra o líder, un Rácing Vilalvés que gañou 3-2 ao Cerceda.
