Santiago de Compostela, a 13 de Outubro de 2016.
Aproveitando o festivo, os xuvenís, o cadete e o Infantil A tiveron xornada entre semana. Un día no que os resultados logrados foron dispares.
En primeiro lugar, a única derrota dos catro encontros foi a do Xuvenil A, que segue sen tomarlle o pulso á competición.
Os de Vecho perderon por 4-1 ante o Rácing de Ferrol, no sempre complicado campo da Gándara. O autor do gol santiagués foi Borja Míguez.
Con este resultado o equipo descende ao décimo sexto lugar. Praza que tentarán mellorar cunha vitoria este fin de semana coa UD Santa Mariña.
Mentras tanto, o xuvenil B empatou ante o Milladoiro SD. Logo da primeira vitoria o sábado pasado, os xuvenís logran un valioso empate que, a pesar de mantelos en postos de descenso, permítelles seguir sumando unha xornada máis.
De novo, os branquiazuis comezaron perdendo, pero Daniel Abeijón anotou no 26 o tanto do empate.
Tentando manter esta xeira, o Xuvenil B xogará este domingo ás 11:15 contra o Noia nas Cancelas.
En canto aos cadetes, logo dunha mala serie de resultados, recuperaron a senda da vitoria, despois de vencer ao EF Lalín por 0-2, no campo Anexo Manuel Anxo Cortizo.
Os goles de Raúl García e Marcos Andrade certificaron un triunfo que sitúa ao equipo en oitavo lugar con 12 puntos.
O próximo partido será o domingo ás 12:45 en As Cancelas contra a SD Villestro, quinta na clasificación con 16 puntos.
Por último, a segunda vitoria do día foi para un Infantil A que goleou na súa visita ao campo de Cadreche.
O conxunto de Juan Vicente Cameán foi moi superior ao Puebla durante todo o partido e así o certifica o resultado final. Dos 13 goles que anotou o Compos, catro foron de Iago Fernández, tres de Quique Rivas, dous de Samuel Gutiérrez e Gerardo Lago, e un de Martín Calatayud e Javier Freire.
Con este resultado, os infantís sitúanse no segundo posto da táboa con 18 puntos en sete partidos, a tan só un do líder, o Amio.
Buscando o liderado, o sábado ás 12:15 no campo de A Merced, os branquiazuis enfrontaranse ao quinto clasificado, a unha SD Negreira que leva 13 puntos.
