-
Movilla e Renán anotaron os goles locais tras senllas xogadas de saque de banda lateral.
Santiago de Compostela, a 22 de Outubro de 2016.
Chegaba o Compos ao campo de A Grela coa firme intención de lograr a súa primeira vitoria fóra do seu feudo, pero regresa coa terceira derrota do curso. O conxunto de Yago Iglesias viuse superado por un Silva que aproveitou o seu poderío nas xogadas laterais.
Sabía Yago da importancia das xogadas a balón parado nun campo como este, e por iso, sacou un once cos xogadores con máis músculo do equipo. Santi Taboada de mediocentro, Ander Bellido de central e por primeira vez na tempada, os dous dianteiros no campo.
A pesar diso, o Silva saíu máis enchufado e súas foron as primeiras ocasións, todas elas neste tipo de xogadas. Varios remates de Movilla tras saques de banda e un tiro de falta de Renán, as máis claras.
Con todo, o seu gol chegou tras a mellor ocasión dos visitantes. No 36, tras varios rexeites dentro da área, o balón caía nos pés de Make, que mandaba o balón rozando a escuadra da meta de Guillermo. E no 37, tras un saque de banda era cando anotaba o Silva. O lanzamento lateral foi mal despexado por David Rey e Movilla adiantábase á saída de Manu Cedrón, para adiantar de cabeza aos seus.
O gol fixo reaccionar aos santiagueses, que con tiros de Nogueira e Saro roldaron o gol, aínda que nunha contra, Alvarito perdoaba o segundo, ao non ser capaz de aproveitar un pase de socato. E no último minuto da primeira metade, Rubén mandaba ao traveseiro unha volea desde a frontal da área.
Parecía que o peor pasara e que tras o descanso o Compos igualaría o choque, pero unha xornada máis recibiu un gol nos primeiros minutos deste segundo tempo, concretamente no minuto 52. Saque de banda de Lema ao punto de penalti e Renán remata de media chilena á rede da portería de Manu Cedrón.
Este segundo tanto fixo moito dano ao Compos, que ata a entrada de Tomás no 64, non volveu roldar a portería de Guillermo. Xa co mediapunta sobre o terreo de xogo, o equipo mellorou e comezaron a chegar máis achegamentos, o máis notable, un remate de Nogueira que se foi arriba.
E no 78, chegaba o gol que daba esperanzas aos santiagueses. Nun córner, tras varios rexeites dentro da área, David Rey empuxaba o balón na liña de gol, despois de que este viñese rebotado do poste da meta de Guillermo.
Con todo, tras o gol visitante o partido perdeu o ritmo a base de faltas, cartóns e unha lea entre ambos os bancos do que saíu expulsado Rodri, segundo adestrador da SD Compostela. Houbo unha última ocasión na última xogada do encontro, pero o remate de Juanin, tras a asistencia de Mitogo, marchouse arriba.
Non puido ser. O Compos caía derrotado en A Grela e terá que agardar a mañá para ver en que posto acaba a xornada. E para a semana, a remontar o voo contra o CD Barco, o domingo ás 17:00 en San Lázaro.
FICHA TÉCNICA:
2- Silva SD: Guillermo; Lema, Guilherme, Beto, Pablo Andrade (Diego Cuesta, m.28); Alvarito (Joao Paulo, m.85), Moure, Michi, Real (Brais, m.53); Renán e Movilla.
1- SD Compostela: Manu Cedrón; Saro, David Rey, Ander, Mon; Julián, Make (Juanin, m.79), Taboada, Rubén (Mitogo, m.54); Santi Gegunde (Tomás, m.64) e David Nogueira.
Árbitro: Alejandro Ferreiro (Colexio lucense). Mostrou cartón marelo a Beto e Movilla polos locais; e a Make, Tomás, Julián e Juanin polo Compos.
Goles: 1-0: Movilla, min.36; 2-0: Renán, min.55; 2-1: David Rey, min.79.
Incidencias: Décima xornada de Liga de Terceira División disputada en A Grela 1 ante 650 espectadores.
