[cs_video column_size=”1/1″ video_url=”https://youtu.be/0x9uYIn5XCc” video_width=”500″ video_height=”250″][/cs_video]
- Tras o empate en Villalonga, a SD Compostela enfrontarase este domingo ás 12:00 ao líder do grupo1 da Terceira División, o Rápido de Bouzas, nun encontro que será emitido pola TVG.
Santiago de Compostela, a 26 de Novembro de 2016.
Despois de tres semanas puntuando, o Compos buscará este domingo un salto de calidade cunha vitoria ante o líder da Liga, un Rápido de Bouzas que camiña con paso firme pola categoría, sustentados nunha gran defensa e unha tripleta atacante moi efectiva.
Segundo Yago Iglesias, o Rápido é “un equipo que evolucionou este ano co seu novo adestrador”. Os vigueses “sempre se caracterizaron por ser un equipo que tentaba realizar un xogo combinativo, pero este curso é un conxunto máis efectivo, máis incisivo e máis vertical”.
Neste estilo de xogo, destaca a presenza de tres homes chave, “que marcan as diferenzas na categoría do mediocampo para adiante, como son Pablo Carnero, Youssef e Iago Paz”. Así, o Rápido é o terceiro máximo goleador da categoría, con 24 tantos, dos cales oito foron anotados por Pablo e cinco por Youssef.
Pero ademais do poderío ofensivo, o conxunto vigués tamén é o menos goleado. Nos catorce partidos que van de Liga só encaixou sete goles, o último deles hai oito xornadas, na súa visita ao Barbadás. Desde ese partido, sumaron dezanove puntos de vinte e un, o que lles permitiu ascender ao primeiro posto.
A pesar da dificultade da fazaña, Yago Iglesias confía nos seus xogadores e cre que lograrán a vitoria, do mesmo xeito que fixeron cando o Vilalbés, líder daquelas, chegou a San Lázaro. “O equipo está a adestrar moi ben. Está con moitas ganas porque vén o líder, e gañarlle sería moi bo a nivel mental”, comenta. “Sería fenomenal gañar, non só polos tres puntos, senón tamén por reencontrarnos coa vitoria en San Lázaro, que para nós é moi importante”, afirma.
Será toda unha proba de lume, que lle permitirá ao Compos “testar o momento no que estamos e tamén por saber se podemos loitar por cotas maiores”.
Para iso, Yago pretende repetir os partidos bos que realizaron en San Lázaro e con este obxectivo elaborará o seu once inicial. “Ao longo da semana estivemos a probar distintas formacións para coñecer en que postos podemos sacar máis rendemento dos nosos xogadores en base ao rival que temos en fronte”, di o adestrador.
Para elaboralo, o técnico do Compos poderá elixir entre os vinte xogadores que ten dispoñibles. Unicamente son baixa Samu e Santi, polas súas respectivas lesións, e Cardeñosa, que foi expulsado en Villalonga. Toda unha oportunidade para elixir os encargados de buscar a machada contra o líder.
