Santiago de Compostela, a 27 de Novembro de 2016.
Custou pero a Sociedade Deportiva Compostela sacou un novo punto na Liga ante o líder. O conxunto santiagués conseguiu sumar de novo ante o Rápido de Bouzas, nun encontro no que os locais tentaron dominar co balón, mentres que os visitantes aproveitaron o xogo directo e as segundas xogadas.
Con esta idea inicial, o Rápido conseguiu xerar moito perigo na meta defendida por Lucas, xa que como reflectiu Yago Iglesias en rolda de prensa, o equipo non estivo fino neses 45 minutos. A defensa visitante estivo moi ben plantada, con dúas liñas de catro moi xuntas que conseguiron roubar moitos balóns, sacando rápidos contraataques que xeraron moito perigo.
As dúas primeiras, no minuto 18 e 19, tiveron un resultado similar. Un centro de Jesús nunha falta que controlou Carlos Pereira, pero que non conseguiu acertar coa meta, grazas á boa reacción de Lucas, e un remate no segundo pau de Pardavila, a centro de Youssef, que se foi fóra por moi pouco. E tres minutos máis tarde, o meta local volvía lucirse cunha espléndida parada ao tiro dunha falta botada por Carlos Pereira.
Para encontrar o primeiro tiro perigoso do Compos, tivemos que esperar ata o minuto 30 de partido, cando Mon, noutra falta na frontal, obrigaba a Diego a lucirse abaixo ante un balón que se coaba pegado ao poste dereito da súa portería.
Con todo, cando parecía mellorar o Compos chegou o gol visitante. Un centro desde a dereita era rematado por Pardavila no segundo pau, que batía a Lucas con serenidade, despois de controlar o balón e axustalo ao poste.
Tras o gol, o Compos mellorou, pero o marcador xa non se moveu antes do descanso. Con todo, á volta do mesmo, a conta anotadora puido aumentar en ambas as áreas. Primeiro Martín desaproveitaba unha clara ocasión de empatar, logo de que fallase un remate de cabeza a pracer tras un balón colgado por Tomás. Mentres que o Rápido respondía con outra acción de Carlos Pereira, tras saque dunha falta en campo propio, que tamén repeleu o porteiro santiagués.
Coa entrada de Nogueira por Martín o equipo mellorou, tivo máis amplitude e así chegou o penalti do empate. Recoba gañou o balón ao lateral, foise do central, regateou ao porteiro e este derrubouno. O encargado de botar a pena máxima foi Mitogo, que batía a Diego cun disparo raso á beira esquerda do meta.
Un tanto moi importante que deu ás ao Compos. O partido rompeu e a balanza puido caer para ambos os lados. Nogueira desaproveitou un man a man no 73, tras unha gran xogada de Recoba, e Youssef facía o propio na área contraria.
E no desconto, primeiro Taboada remataba arriba un córner perfectamente botado ao punto de penalti e Lucas volvía lucirse ante un remate de Carnero. No rexeite do mesmo, Youssef volvía mandar fora o balón, cun disparo que marchou axustado ao poste da meta. O balón non entrou e os puntos repartíronse entre ambos os contendentes. O Compos suma por cuarta semana consecutiva, mentres que o Rápido mantén o liderado grazas ao punto sumado en San Lázaro.
FICHA TÉCNICA
1- SD Compostela: Lucas; Saro, David Rey, Taboada (C), Cabrejo; Mon; Julián, Tomás, Recoba (Make, m.87), Martín (Nogueira, m.54); e Mitogo (Diego Rey, m.65).
1- Rápido de Bouzas: Diego; Jesús, Portas (C), Vieytes, Coti; Parda (Nico, m.67), Yago Pérez (Rocha, m.80), Iago Paz, Youssef; Carlos Pereira (Rulo, m.63) e Pablo Carnero.
Goles: 0-1: Pardavila, min.34; 1-1: Mitogo, min.58.
Árbitro: Villanueva Carballo, colexio pontevedrés. Sacou cartón marelo a Cabrejo, Taboada, Tomás e Diego Rey polos locais, e a Vieytes, Yago Pérez e Diego polos visitantes.
Incidencias: Partido disputado no Estadio Municipal de San Lázaro ante 556 espectadores.
