Santiago de Compostela, a 28 de novembro de 2016
A etapa de Juan Bautista Rey Gómez co Compostela terminou no día de hoxe. Despois de dúas tempadas nas categorías inferiores do conxunto santiagués, e estes últimos cinco meses no primeiro equipo, o xogador decidiu solicitar a baixa federativa á Sociedade Deportiva Compostela.
O dianteiro, que xa debutara o curso pasado co equipo de Segunda División B, e mesmo na eliminatoria de Copa do Rey, decidiu así poñer fin á súa etapa no Compos, buscando un novo destino para a súa carreira futbolística.
A entidade lamenta a perda dun dos elementos que conformaban este novo proxecto, á vez que agradece a Juanin todo o esforzo, sacrificio e traballo achegados a estas cores. Ademais, tamén lle desexa toda a sorte do mundo para o seu futuro.
A Sociedade Deportiva Compostela sempre será a súa casa e acollerao cos brazos abertos.
