Santiago de Compostela, a 20 de Abril de 2017.
Despois do parón de Semana Santa, a gran maioría dos equipos das categorías inferiores da SD Compostela recuperarán o ritmo competitivo. Exceptuando o Xuvenil A, que xogará un amigable, e o Benxamín, que descansa esta xornada, o resto de conxuntos continuarán coas súas respectivas competicións.
Precisamente, o amigable do Xuvenil de Nacional será contra o CD Unión e xogarase o sábado ás 12:30 no campo de Vilas.
Pola súa banda, o Xuvenil B, despois do seu vital triunfo da semana pasada, buscará repetir vitoria contra o Val Do Ulla, o sábado ás 19h nas Cancelas.
O Cadete, coa tranquilidade de estar situado en metade de táboa, renderá visita ao Vitoria FC, o domingo ás 10h no campo do Sergas.
Fóra de casa tamén xogarán ambos os infantís. O A enfrontarase ao Villestro, o sábado ás 10:30 na Barrosa; mentres que o B fará o propio o venres ás 19:15 nas Cancelas contra o San Pedro, na Copa de Santiago.
O Alevín A seguirá co seu playoff enfrontándose ao Amio SD, o sábado ás 11:30 nas Cancelas; mentres que o Alevín B tamén se medirá ao Amio nas Cancelas, aínda que no seu caso, o partido xogarase ás 12:30.
Por último, citar que Abril Pazos está a xogar o Campionato Nacional de Seleccións Autonómicas coa Selección Galega Sub12 Feminina en Guadarrama.
