[cs_video column_size=”1/1″ video_url=”https://www.youtube.com/watch?v=CDZ2bUY9lWI” video_width=”500″ video_height=”250″][/cs_video]
Santiago de Compostela, a 21 de Abril de 2017.
Unha nova oportunidade. A SD Compostela busca recuperar a senda da vitoria e para iso enfrontarase este sábado pola tarde (18h) ao CD Choco en San Lázaro.
O equipo de Yago Iglesias, tras dúas derrotas contra o Villalonga e Rápido, quere sumar de tres para ter algunha oportunidade de clasificarse para o playoff de ascenso.
O rival para lograr este obxectivo será un Choco que tenta escapar dos postos de perigo, tras unha segunda volta na que están a render a gran nivel.
“Empezaron titubéante, debido a que ao xogar a fase tardaron máis en volver aos adestramentos. Ademais, os resultados non lles acompañaron e metéronse aí abaixo. Pero non é ningunha sorpresa a súa segunda volta, xa que son un equipo moi competitivo, con moi bos xogadores de medio campo para arriba”, analiza Yago.
No partido en Redondela, ambos os conxuntos empataron a un gol, nun encontro en que os vermellos se adiantaron nos primeiros minutos por mediación de Rober, tanto neutralizado polos santiagueses cun gol de Tomás Abelleira. Aínda así, o técnico branquiazul sabe que “se o equipo está na liña de San Lázaro, non ten que temer ao rival”. Ese Compostela que desexa é “ese conxunto vertical, que sabe dominar co balón e que é moi competitivo”. Ese estilo futbolístico é vital para que “volvamos marcar”.
Na mesma liña que o adestrador, Juan Cabrejo agarda que o partido contra o Villalonga fose “un mal día” e que este sábado “volvamos ver o Compostela de fai tres semanas, ese conxunto que fai correr ao rival detrás do balón”.
O lateral, coa súa enorme experiencia, é consciente que “nestas catro semanas pode pasar de todo”. En palabras de Cabrejo, “coas dúas últimas derrotas témolo máis difícil, pero loitaremos ata o final para conseguilo, por nós, a afección e este club”. Entrar na zona de playoff sería “un final perfecto” para unha carreira tan lonxeva como a súa.
Por último, Yago e Cabrejo recalcaron que agardan atoparse un San Lázaro moi colorido, nun partido que se xogará nun día moi pouco habitual para os santiagueses. A afección ten que ser o xogador número doce para que os tres puntos volvan quedar na casa.
