[cs_video column_size=”1/1″ video_url=”https://youtu.be/aBLrFIEoJes” video_width=”500″ video_height=”250″][/cs_video]
Santiago de Compostela, a 12 de Maio de 2017.
Este sábado pecharase unha tempada máis da SD Compostela, un ano de transición na Terceira División no que se asentaron cun club repleto de xente nova. Estes xogadores demostraron a súa valía, mellorando cada mes, demostrando a súa rodaxe nunha nova categoría, para algúns deles.
Así, tras non ser capaces de meterse no playoff, loitarán por manter a sétima praza na dura visita ao campo dos Carrís, en Barbadás. Un encontro que se xogará nun campo de herba artificial, moi diferente ao que está afeito pisar o cadro branquiazul.
Na primeira volta, a vitoria quedou na casa, con dous goles nas postrimerías do encontro, polo que corpo técnico e plantel esperan repetir o triunfo. “Imos a por os tres puntos, para superar os 60”, comentou Yago en rolda de prensa.
Para iso, “teremos que adaptarnos a un terreo de xogo cunhas condicións moi diferentes ás que estamos afeitos”, sinala. O campo dos Carrís, é de herba artificial, con moito caucho, xa que nel “xogan moitos conxuntos da zona”.
Debido a estas circunstancias, “optaremos por un tipo de xogador para un fútbol máis directo, con menos posesión e máis verticais, máis físicos no duelo”, explicou o técnico branquiazul.
Entre eles, espera estar Samu, que volveu a xogar nas últimas xornadas. “Empezo a sentirme ben fisicamente outra vez. É unha pena que volva coller sensacións agora tan tarde, pero é que me custou moito volver ao grupo tras a lesión”, afirmou o xogador.
O mediocentro tamén destacou que irán a terras ourensás a gañar, porque “queremos quedar o máis arriba posible”. Segundo Samu, o grupo ten a sensación de que non entraron en playoff por erros propios. “Faltounos dar ese plus para poder entrar”, aclarou.
Por último, Yago definiu ao rival deste sábado, o Barbadás, como “un equipo con xogadores moi interesantes. Ficharon a varios portugueses, entre eles o dianteiro Rodri, que xogou nas categorías inferiores do Benfica”.
Así, a tarefa non será nada sinxela, pero buscarán a forma de poder lograr unha vitoria coa que pechar o ano en boa dinámica. O obxectivo é despedir o ano en Ourense co cuarto triunfo de visitantes.
