Santiago de Compostela, a 13 de Maio de 2017.
A SD Compostela 2016/17 puxo hoxe en Barbadás fin a un ano de transición co cuarto triunfo lonxe de San Lázaro. Os mozos de Yago Iglesias souberon adaptarse a un campo cunhas condicións moi diferentes ás do feudo santiagués e sumaron tres puntos máis para chegar aos 62.
Nunha tarde chuviosa, os branquiazuis remontaron o tanto inicial dos ourensáns, con senllos goles de Cardeñosa e Samu, nun intervalo de tan só cinco minutos, do 55 ao 60.
Cunha aliñación na que saían dous dianteiros centros, como Nogueira e Santi, o Compos buscou nos Carrís sacar os tres puntos a base de dominar o encontro, o cal non foi unha tarefa nada sinxela.
A falta de práctica nun campo con estas condicións provocou que os branquiazuis tivesen problemas para enlazar xogadas. Así, quedaron uns primeiros 45 minutos de escasas xogadas de perigo. Con todo, á volta dos vestiarios, todo cambiou a partir do gol local.
Nada máis saltar ao terreo de xogo, Igor adiantaba aos seus cun croque a un centro lateral.
Con todo, este tanto espoleou aos composteláns, que sacaron todo o seu arsenal para dobregar ao conxunto local. Con máis acerto no pase chegaron máis achegamentos e deles apareceron as ocasións e os goles.
No 55, tras un córner botado por Mon, Cardeñosa demostraba o seu poderío aéreo, para impoñerse á zaga azulona e poñer as táboas no marcador. E sen tempo para asumilo, xa chegou o segundo, o da remontada. Diego Rey deixaba nunha posición franca a Samu e o mediocentro a colacaba ao pau longo, facendo imposible calquera intento de Berto por parala.
Con todo, cando mellor estaba o Compos, unha nova acción cambiaría a senda do partido. O colexiado sinalou un penalti de Ander a un xogador local, pero Lorenzo aparecería como o salvador dos santiagueses. Berto, o meta local, sería o encargado de executar a pena máxima, lanzando o balón á beira dereita de Loren, pero o cancerbeiro branquiazul acertaría o lado e despexaríaa. Con esta parada, contrarrestou a ocasión máis clara visitante e abriu un período de vinte minutos de control santiagués.
Un minuto despois do penalti, Nogueira non foi capaz de acertar nun man a man con Berto e dous máis tarde a Diego Rey escapábaselle un control cando quedaba só contra o porteiro. No últimos dez minutos, Martín aínda tería outra opción, pero o resultado xa non se moveu.
Gran forma de pechar unha tempada, provocando unha ilusión na afección xa que estes xogadores, que tiveron unha clara progresión durante o ano, conformarán o bloque que leve ao Compos onde se merece, nas próximas tempadas. Todos desexamos que esta vitoria sexa unha premonición para o que veña no futuro.
FICHA TÉCNICA
1- UD Barbadás: Berto; Iago (Martín, m.71), Lamelas (Bruno, m.76), Germán, Geno; Cassio, Luís; Nespereira (Camba, m.82), Rodrigo, Alfredo; e Igor.
2- SD Compostela: Lorenzo, Saro, David Rey (Ander, m.55), Cardeñosa, Cabrejo; Samu, Mon, Make; Diego Rey (Martín, m.78), Nogueira (Rubén, m.78) e Santi Gegunde.
Goles: 1-0: Igor, min.46; 1-1: Cardeñosa, min.51; 1-2: Samu, min.58.
Árbitro: Abel Bruzos, comité lucense. Amoestou a Martín polos locais; e a Ander, Cardeñosa, Rubén e Mon, polos visitantes.
Incidencias: Partido da trixésimo oitava, e última xornada de Liga, disputado no campo dos Carrís (Barbadás) ante 300 especadores. Antes do encontro, ambos os equipos fixeron un corredor ao Valenzá, filial dos azuis, polo seu ascenso á 1ª Rexional.
