Santiago de Compostela, a 23 de Maio de 2017.
A tempada 2017/18 da SD Compostela comeza a coller forma e o primeiro paso para manter o proxecto iniciado o curso pasado é a continuidade do corpo técnico. Yago Iglesias (06/10/1982) seguirá sendo, un ano máis, o adestrador do Compos. Acompañado polo seu corpo técnico, dirixirá a entidade santiaguesa na súa segunda tempada na Terceira División Galega.
Tras un curso de transición, na que o club quedou na sétima posición con 62 puntos, o Compos encara un novo ano na que o obxectivo será “dar un salto e entrar no playoff”, tal e como reflectiron Yago Iglesias, o presidente, Antonio Quinteiro, e o director deportivo, Manu Castiñeiras, na rolda de prensa na que se confirmou a continuidade do técnico.
O dirixente do club santiagués quixo felicitar a Yago e os seus colaboradores polo logrado na tempada, conseguindo “cun grupo totalmente novo, realizado de forma express, e nun lugar e club novo, os obxectivos marcados a principio de tempada con suficiencia”. Por iso, “estamos satisfeitos coa decisión tomada o ano pasado de elixilo a el como o temón deste proxecto”.
Así, o presidente recalcou que “queremos que sexa o ano da continuidade, tras un curso de rodaxe no que aprendemos moito todos”.
Pola súa banda, Yago, e facendo partícipe aos seus compañeiros, quixo dar as grazas á directiva por “manter a confianza en que sigamos á fronte do proxecto”. O técnico matizou que o verán pasado sentaron unhas bases claras para un proxecto a medio e longo prazo, obxectivo que “non deu bandazos nos dez meses de competición, o cal é un orgullo para este club”.
Mentres, Manu Castiñeiras, director deportivo da entidade, reiterou que “visto o visto, acertamos claramente na decisión de contratar a Yago para este proxecto de futuro”.
Respecto ao novo ano, os tres apostan por un salto de nivel, o que significa, entrar no playoff. Tras este curso de transición, na que o club quedou sétimo, o seguinte paso é entrar entre os catro primeiros.
Con esta meta, “traballaremos doutra maneira”, sinalou Antonio, xa que “temos case dous meses ata a pretempada, nos que Manu, xunto a Javier Bellido colaborando desde a base, conformarannos un proxecto con moito potencial”.
Neste plan, “manteremos a gran parte do bloque, empezando polo corpo técnico, aos que buscaremos eses complementos que nos dean o salto de calidade necesario”, explicou o director deportivo. Uns movementos que se manterán no sentado o ano pasado: “xogadores novos, con proxección e ganas de crecer no Compostela”, dixo Antonio.
“Con tempo, e cunha base de xogadores que xa teñen un ano de experiencia na categoría e traballando xuntos, esperamos dar ese salto”, recalcou Yago. O corpo técnico busca “manter á afección orgullosa, porque será fundamental para lograr os obxectivos”. Yago e os seus homes están moi agradecidos de que o público entendese o que buscaba o club e queren compensar esa fidelidade, cuns maiores éxitos deportivos.
O que está claro é que co traballo desta tempada, “temos moito andado”, confirmou Yago. Agora queda, como dixeron, acertar coas pezas. Eses cambios chegarán, en primeiro lugar, “nos postos do lateral esquerdo e central, polas baixas coñecidas de Cabrejo e David Rey”. A continuación, Yago pretende atopar “xogadores do último terzo de campo, con talento, e diferentes ao perfil dos que temos”.
Xuntando todo, e aínda que o obxectivo sexa máis ambicioso, directiva e corpo técnico teñen claro que “se se aprenden dos erros cometidos o curso pasado e se se acerta na toma de decisións, a meta do playoff chegará”. O traballo diario de Yago Iglesias e os seus mozos será vital para chegar a estas cotas.
