Santiago de Compostela, a 24 de Maio de 2017.
Lucas Díaz Parcero, alias “o gato”, recibiu esta mañá en Reizentolo o premio ao #Jugador5EstrellasCOMPOS, galardón que outorga Mahou ao xogador da tempada 2016/17. A afección compostelanista decidiu, a través das redes sociais, que o porteiro era merecedor deste premio, debido ao seu gran traballo baixo os paus, neste ano de transición para o club.
O mozo gardameta disputou este curso un total de 31 partidos coma titular na Terceira División, nos que encaixou 38 tantos, con seis encontros nos que non lle meteron ningún gol. Ademais, parou un penalti ante o Cerceda, atallada que permitiu que o conxunto conseguise a vitoria nese encontro.
Na votación para o mellor xogador da tempada, Lucas superou a Mon, Recoba, Diego Rey e Uña, futbolistas tamén nominados e dos que o meta se quixo acordar á hora de recibir o galardón. “Creo que todos os nominados o podíamos levar, polo que estou moi agradecido de que me escollesen a min”, dixo. A maiores, o xogador de Bembibre destacou que está moi contento co premio e que se sente querido polos compostelanistas.
En canto a súa labor baixo os paus, Lucas fixo unha comparativa coa do equipo: “Ao principio tiven que adaptarme á categoría, xa que nunca xogara en ela, pero pouquiño a pouco fun gañando minutos e confianza, e creo que acabei ben a tempada”.
O gardameta sabe que o plantel comezou o ano algo irregular, “sobre todo fora da casa”, pero que foron a máis durante o ano, polo que para a tempada próxima, parécelle fantástico que o obxectivo sexa entrar entre os catros primeiros, porque “este club merece, como mínimo, estar xogando o playoff”.
