Santiago de Compostela, a 26 de Maio de 2017.
Os conxuntos da base da SD Compostela volven ao rodo esta fin de semana de festas da Ascensión, nunha semana na que o Infantil A xogou o seu primeiro partido da fase de ascenso, encontro no que perdeu por 3-0, complicando seriamente o seu pase á seguinte rolda.
Os mozos de Juanvi visitaron a cancha do Valiño Cabo da Cruz, segundo clasificado na súa Liga, e víronse superados polo cadro costeiro. Os locais adiantáronse no minuto 32 co tanto de Martín González, ampliaron a vantaxe no 68 co gol de Marcos Lorenzo e sentenciaron no último minuto coa diana de Alan Davila.
Agora, os branquiazuis terán que saír con todo na volta para poder darlle a volta á eliminatoria. Ese encontro xogarase este sábado, ás 12h, nas Cancelas.
Con todo, non será o seu único encontro da semana, xa que xogarán o luns, ás 19:45, no Municipal de Bertamiráns, o partido de volta dos cuartos de final da Copa do Sar, choque no que tentarán manter a vantaxe cultivada na ida.
No resto de conxuntos destaca, especialmente, o duelo decisivo do xuvenil de Nacional ante o Choco. Con tres puntos de vantaxe sobre o descenso a falta de dúas xornadas, buscarán sumar algún punto nesta dura visita aos redondelanos para facilitar a salvación. O duelo xogarase o domingo ás 12h en Santa Mariña.
O Cadete, á súa vez, xogará o domingo ás 11h nas Cancelas, na ida das semifinais da Copa de Santiago ante o Compañía de María. Tras a súa épica remontada ante o Amio, os branquiazuis chegan cargados de moral para meterse na final.
Nos alevíns, volverán ter fin de semana de torneos. O A viaxará a Rianxo, para xogar o domingo un torneo no concello, mentres que o B disputará o sábado o Torneo de Calo.
Por último, o benxamín visitará ao La Salle, sábado ás 10h en Santa Isabel, coa intención de volver gañar e deixar case certificada a salvación no playoff de descenso.
