-
O extremo arousano amplía o seu contrato por un ano
Santiago de Compostela, a 6 de Xuño de 2017.
O desequilibrio e velocidade de Rubén Martínez Castro seguirán conquistando os corazóns dos compostelanistas. O xogador de Vilagarcía de Arousa amplía o seu contrato coa entidade santiaguesa por un ano, cumprindo, deste xeito, o seu segundo curso ás ordes de Yago Iglesias.
O futbolista de 22 anos chegou o verán pasado ao Compos procedente do Arosa, conxunto no que xogou desde pequeno ata o primeiro equipo, e, a pesar de que unha lesión na pretemporada lle impediu comezar ao ritmo dos seus compañeiros, o seu traballo e bo rendemento levárono ao once inicial dos santiagueses.
A pesar de ser pouco coñecido dentro do público branquiazul, Rubén sorprendeu gratamente á afección coas súas actuacións na banda. Os seus dous primeiros encontros disputados, ante Villalbés e Bergantiños, encontro este último no que marcou o seu único gol do ano, xa presaxiaron que sería un xogador que tería un gran protagonismo ao longo do curso, e así foi.
O extremo zurdo acabaría a tempada con vinte partidos disputados, doce deles saíndo desde o once inicial. En total acumulou 935 minutos, nos que anotou un gol e recibiu catro cartóns marelos. Ademais, participou en numerosos tantos dos nosos, xa fose con asistencias ou con caneos na banda que provocasen vantaxes, aproveitadas posteriormente polos seus compañeiros.
Coa firma de Rubén, Yago conta, a día de hoxe, con dez xogadores para a nova tempada: o porteiro Lucas; os defensas Cardeñosa e Uña; os centrocampistas Ube, Mon, Alberto e Casas; os extremos Diego Rey e Rubén; e o dianteiro Santi Gegunde.
