-
“Traballaremos polo mellor futuro para os vosos fillos”.
Santiago de Compostela, a 16 de Xuño de 2017.
Ante o aluvión de preguntas por parte dos pais dos xogadores da base, Antonio Quinteiro, presidente da SD Compostela, quere achegar tranquilidade e confianza a todos os familiares dos xogadores, xa que se está traballando para sacar o mellor proxecto posible nas categorías inferiores.
A pesar da decisión da directiva de que non continúe Juanvi e a posterior renuncia de Javier Bellido, ao considerar que Juan Vicente era unha persoa da súa total confianza, o club seguirá adiante coa súa idea para levar a canteira.
“O club ofrecerá o mellor proxecto posible para os vosos fillos, como demostramos co nomeamento de Manuel Castiñeiras, como director deportivo xeneral, e de David Rey, como coordinador das categorías inferiores de fútbol 11”, aclara Antonio.
Ademais, “falaremos con todos os adestradores da base para que continúen, xa que coñecemos a súa capacidade de traballo e estamos contentos con iso”, engade.
Por todo iso, “quero transmitirvos tranquilidade e confianza no proxecto da nosa canteira, convidándovos a que sigades apostando por el, porque traballaremos polos vosos nenos e nenas para o seu mellor futuro”.
