-
O extremo, procedente do Choco, firma ata xuño de 2018.
Santiago de Compostela, a 17 de Xuño de 2017.
Un reforzo para ambas as bandas. Roberto Fernández Martínez (O Porriño, 19/09/89), extremo procedente do CD Choco, é a cuarta fichaxe da SD Compostela 2017/18. O xogador, tras un periplo de catro anos nas filas choqueiras, firma co Compos por unha tempada.
‘Róber’ é un extremo que pode xogar tanto pola dereita, como pola esquerda, polo que virá competir por un posto cos extremos, que xa renovaron o seu vínculo co equipo, Diego Rey e Rubén Martínez.
A nova incorporación chega tras un brillante ano no Choco, o mellor en cifras, dos catro cursos que estivo alí, nunha tempada na que o equipo comezou mal, pero acabou no décimo lugar, tras unha segunda volta fantástica. Xogou un total de 34 partidos, 29 de titular e os restantes cinco de suplente, nos que anotou, a pesar de xogar en banda, 13 goles, un deles de penalti.
Nos partidos que xogou este ano pasado contra o Compos causou unha gran sensación. Foi o único futbolista que foi capaz de bater a Lucas, xa que anotou o gol da ida e os dous da volta. Foron tres tantos que serviron ao seu equipo para empatar ambos encontros contra os nosos.
En cursos pasados, nun Choco que pelexou polo playoff de ascenso, participou en 35, 26 e 17 choques, respectivamente. Nesas tres tempadas anotou nove goles, sendo a primeira delas, con seis, a máis frutífera ata o curso pasado.
Con esta nova incorporación, o Compos ficha a un xogador con ampla experiencia na categoría, xa que tamén disputou unha tempada co Cultural Areas, e que xa sabe o que significa pelexar polo playoff de ascenso, e disputalo. A directiva espera ademais que manteña a súa xeira goleadora en San Lázaro, o que reportará vitorias ao equipo.
Con Róber son xa dezaseis, os xogadores que se comprometeron coa nosa entidade, dos cales, catro son caras novas. De todas elas, esta nova incorporación é a primeira que vén ocupar un posto do último terzo de campo.
