Santiago de Compostela, a 20 de Xuño de 2017.
Gonzalo García Recoba non seguirá na SD Compostela. O gran mediapunta colga as botas, tras un último ano no noso equipo, para dar un paso máis na súa carreira, a cal seguirá ligada ao mundo do fútbol, pero desde os bancos.
Tras un breve paso polo Compos, co que comezou a adestrar a principio de tempada, pero a xogar en decembro, Recoba firma como primeiro adestrador do Esbjerg, conxunto da Segunda División Danesa.
Nesta segunda etapa no Compos, Gonzalo xogou un total de 23 partidos, todos menos un de titular, nos que anotou sete goles, ademais de participar en numerosas xogadas que acabaron en goles ou ocasións dos seus compañeiros.
A chegada de “O Messi dá Terceira” deulle un salto de nivel ao equipo. Os compañeiros gozaron da calidade futbolística de Recoba, quen lles axudou a ser mellores, pero tamén da súa calidade humana. En definitiva, un gran compañeiro, tanto dentro como fóra dos terreos de xogo.
Aínda que che botaremos moito de menos, alegrámonos de que estes meses en casa Compos che servísen para sacar o título de adestrador, co cal obtiveches o teu primeiro traballo en terras danesas. Despois da túa experiencia connosco, estamos convencidos de que a túa carreira nos bancos será tan exitosa coma no fútbol. Desexámosche a maior sorte do mundo, cun futuro de adestrador no que logres moitos éxitos. Grazas, Gonzalo.
