Santiago de Compostela, a 29 de Xuño de 2017.
A Sd Compostela 17/18 terá un novo fisioterapeuta. Alberto Chaves Camino (30/05/1990) ocupará o posto que quedou vacante para este novo ano dentro do corpo técnico santiagués.
Alberto é un fisioterapeuta graduado pola Universidade de Vigo, ademais, vai polo cuarto ano dos estudos de osteopatía e tamén compite como atleta.
Tras acabar os estudos en 2012, abriu, xunta á súa irmá, unha clínica de fisioterapia chamada REHAB, na cal traballa actualmente, e que está situada na Rúa do Valiño, na zona de San Lázaro.
En canto ao ámbito deportivo, Alberto leva tres anos no Arteal Santiago, equipo da Superdivisión de Tenis de Mesa española, e catro co UD Bastavales, conxunto de fútbol que acaba de ascender a Primeira Rexional.
Por último, como atleta, compite no ámbito nacional e autonómico, sendo o vixente campión galego de 800 metros en pista e da milla, título que xa conseguise en 2016.
