Santiago de Compostela, a 29 de Xuño de 2017.
O santiagués Álvaro Casas, recente fichaxe do Compos, compartiu as súas experiencias cos nenos do Campus no cuarto día do mesmo. Os mozos recibiron os consellos dun xogador que creceu en equipos santiagueses como eles, dando o salto ao Celta en xuvenís.
Noutro día en que a choiva fixo acto de presenza, os canteiráns, xa afeitos ás inclemencias do tempo, gozaron do penúltimo día de actividades. A semana vai chegando ao seu fin e o cansazo vai facendo efecto nos pequenos, pero seguen coa mesma ilusión que o primeiro día.
Coa visita de Álvaro, sorteáronse entre os corenta participantes, un paraugas e dúas bufandas do Compos, unha camiseta do Oviedo e outra do Celta, estas últimas, entregadas polo novo xogador branquiazul.
Para o último día, no que se entregarán, ademais dos habituais premios, os diplomas que certifican a asistencia ao Campus, estarán cos nenos, Emilio Mato, administrador de EMAC, patrocinador principal do Campus, e Borja Iglesias, xogador do Celta de Vigo.
