-
Álex Otero preparou unha táboa de exercicios para cada xogador.
Santiago de Compostela, a 10 de Xullo de 2017.
O plantel da SD Compostela, a pesar de que non arrinca os adestramentos ata o vindeiro martes, xa comezou a súa preparación para a nova tempada, na que esperan lograr o obxectivo de meterse no playoff de ascenso.
Para alcanzar esta meta, o conxunto branquiazul sabe que ten que entoarse desde o primeiro minuto, chegar ao primeiro partido ben de forma, e non desaproveitar ningunha das 38 xornadas para sumar puntos que o acheguen a eses catros primeiros postos.
Así, para conseguir que os xogadores cheguen con algo de rodaxe ao comezo da pretempada, o noso preparador físico, Álex Otero, encargouse de deseñar unha táboa de exercicios para cada futbolista, tentando poñer a punto o corpo ante a dura carga de traballo que lle espera o próximo mes. Con estas actividades búscase, por unha banda, que o corpo vaia collendo ritmo e, por outro, evitar sobrecargas musculares ante a acumulación de partidos e adestramentos nesta tempada estival.
A táboa realizada polo noso preparador conta con cinco días de traballo e dous de descanso, o mércores e o domingo. Entre os exercicios requiridos están carreira continua, realización de series ou traballo de CORE.
Con tempo suficiente para preparar a tempada, o corpo técnico do Compos quere ter todo baixo control para que os obxectivos ao final da mesma se cumpran. Esta só é unha proba máis de que todo o plantel está cos cinco sentidos postos no que agardan que sexa un ano de moitas alegrías.
