- No acto presentouse a Percent Compostela como partner oficial de vivenda da SD Compostela.
Santiago de Compostela, a 27 de Xullo de 2017.
Os compostelanistas xa coñecen ao novo home gol da SD Compostela. Óscar Conde Cruz, máis coñecido polo alcume de ‘Primo’, foi presentado esta mañá como novo xogador do Compos na Sala de Trofeos do club, nun acto no que estiveron presentes tamén Carlos Debasa, xerente territorial de Percent, e Ramón Castro, director das relacións institucionais da entidade.
O dianteiro cántabro, tras días adestrando co seu novo plantel, considera que “hai un grupo de persoas fenomenal, capaz de lograr grandes cousas”. Primo está encantado de estar no seu novo club e dentro dun bloque de xogadores “moi humildes e moi traballadores”. Ademais, chamoulle a atención a calidade que teñen na forma de xogar, polo que “temos que levar o peso dos partidos, sobre todo no noso estadio”, asegura.
Neste estilo de xogo, o punta séntese moi cómodo, xa que a pesar de ser un dianteiro con desmarque, gústalle baixar a recibir. Afeito a meter unha gran cantidade de goles por tempada, Primo asegura que “con tranquilidade, as cousas chegan ao seu tempo”. Confía en si mesmo e tamén na capacidade dos seus compañeiros para axudarlle a meter máis tantos.
De momento, xa marcou no seu primeiro amigable, aínda que non participou no segundo por un problema nos isquios. “Nótase que só tiven dúas semanas de descanso. Once meses de fútbol fanse longos, pero espero estar ao 100% para a Copa Deputación”, comenta.
Con todo, a fichaxe branquiazul espera comezar a tempada canto antes para devolver ao equipo a categorías superiores. “É un club histórico e moi coñecido en toda España”, polo que na negociación, aínda que lle pediu uns días á dirección deportiva compostelanista para descansar, “cando necesitaron a resposta, non o dubidei”, afirma.
Anteriormente, no acto de presentación, Ramón Castro foi o encargado de abrilo presentando tanto ao director da inmobiliaria compostelá como ao dianteiro centro, ao que lle desexou a maior das sortes para perforar as porterías rivais. Ademais explicou o novo vínculo de Percent Compostela co Compos, como novo partner oficial de vivenda.
Pola súa banda, Carlos detallou a nova relación entre ambas entidades. Desde esta tempada, tal como citara Ramón, a súa empresa será partner oficial de vivenda do Compostela, con descontos para xogadores e traballadores do club, pero tamén para os abonados, que contarán cunha rebaixa no prezo co seu carné de socio. A entidade tamén terá presenza en publicidade estática no campo e nunha das camisetas de xogo. Estes serán os detalles dun acordo que espera, “siga moitas tempadas máis”, citou Carlos Debasa.
