-
O xogador foi presentado na Sala de Trofeos do club, nun acto no que Laucreaciones confirmou o seu apoio un ano máis ao Compos.
Santiago de Compostela, a 8 de agosto.
A SD Compostela presentou esta mañá á súa nova cara, o dianteiro de Ribeira José Sobrido González. O mozo explicou no acto as razóns que o levaron a aceptar esta oferta, o rol que espera desenrolar no equipo e asegurou “estar impresionado” coa calidade dos compañeiros e as instalacións da entidade.
Cunha semana de adestramentos en Santiago, Sobrido comentou que sente moi cómodo no seu novo equipo, xa que “os compañeiros son moi próximos e ademais coñezo a algún como Ube”. Ademais, Yago Iglesias transmitiulle moita confianza, asegurándolle que “con traballo e esforzo” confiará nel.
Estas boas sensacións víronse incrementadas no seu debut coa branquiazul, o sábado en Praiña, onde marcou dous goles nos dous partidos. Eses tantos chegaron grazas a uns compañeiros que “teñen moita calidade”, polo que o punta confía en que “con esforzo e ganas” poderán lograr o máximo, é dicir, meterse no playoff.
Para iso, terán que pelexar duro nunha categoría que considera moi dura, aínda que sabe que a pesar de ser un plantel novo, “moitos teñen experiencia e saben cando ir forte, polo que creo que estamos moi ben preparados”.
Por último, en canto á oferta, Sobrido explicou que “ao saír de xuvenís, necesitas minutos e no Celta B non ía ter tantos como desexa”, polo que non o pensou moito cando lle chegou a oferta do Compos. Unha vez na capital de Galicia, quedou impresionado, apuntou, coas instalacións, tanto de adestramento como de xogo, algo que se suma á proximidade coa súa casa.
Todos estes puntos a favor axudan a que o ribeirense se senta moi a gusto no seu novo equipo, no que espera xogar de punta, aínda que “podo derivar a miña posición á banda esquerda”.
Doutra banda, na presentación, o novo punta estivo acompañado por Ramón Castro, director das relacións institucionais do club, Javier Puñal, director de márketing da entidade, e Marcos Sanmartín, administrador de Laucreaciones.
O xerente da empresa santiaguesa confirmou a súa continuidade como patrocinador oficial do club, unha relación que espera “se manteña no tempo”. Do mesmo xeito, Marcos agredeceu a confianza da entidade na súa compañía, xa que é un club “que levamos moi dentro”.
Pola súa banda, Ramón Castro foi o mestre de cerimonias, presentando ao “golista” da SD, como comentou, mentres que Javi, agradeceu a “fidelidade e compromiso dunha empresa que está a crecer en Santiago, elixindo ao Compos como vehículo de comunicación”.
Ampliación Campaña Abonados
Ramón Castro fixo un inciso na ampliación da campaña de abonados ata o día 8 de setembro, co obxectivo de aumentar os socios na medida da calidade dos nosos xogadores. “Decidimos prorrogar o tempo, xa que hai xente que lle supón un agravio se regresa en agosto das súas vacacións”, argumentou.
