-
En Reizentolo, Mon e Casas foron os modelos que portaron as indumentarias.
Santiago de Compostela, ao 11 de agosto de 2017.
Esta mañá, a tenda oficial da SD Compostela -en Reizentolo-, foi o lugar escollido polo club para a presentación das súas equipacións para a nova tempada 2017/18, un ano de continuidade no bloque, pero con obxectivos máis altos.
Co capitán Mon Vives e o recentemente chegado Álvaro Casas, o club mostrou as súas novas camisetas, as cales, segundo apunta o director de márketing Javier Puñal, teñen “un toque máis elegante, coa intención de crear tendencia ano a ano”.
Para o primeiro equipamento, púxose “un pescozo máis clásico, con raia diplomática, mentres que as mangas, a diferenza do formato doutras tempadas, están sen intercambiar”, comenta Javier Puñal.
En canto á segunda, o club repite coa figura do peregrino, aínda que o curso pasado era unha sombra e neste unha silueta. “Está pensada na xente de Santiago, pero tamén na canle souvenir dos peregrinos que visitan a cidade”, sinala o director de márketing.
En canto ao prezo, ambas as camisetas custarán 49 euros, mantendo un prezo que “se pode parecer alto para a categoría, non o é se pensamos na entidade do club”, comenta Javier. Ademais, ten un tecido de alta calidade, hidrófugo.
A pesar de que non as veremos nos xogadores ata a primeira xornada do campionato, o vindeiro domingo en San Lázaro ás sete da tarde, as equipacións están xa á venda na tenda oficial, en Reizentolo, e na tenda online, albergada na páxina web do club (www.sdcompostela.com).
