- Yago Iglesias: “Esperemos que o traballo estival se vexa reflictido na competición oficial”
Santiago de Compostela, ao 18 de agosto de 2018.
A tempada 2017/18 xa está aquí. Cunha semana de adianto respecto ao curso pasado, a SD Compostela encara un ano ilusionante no que esperan meterse en postos de playoff. Para iso, será importante que San Lázaro sexa un fortín e non deixar escapar puntos fóra da casa, un obxectivo que esperan ir cumprindo ao longo do curso grazas ao novo plantel, no que se mantén gran parte do bloque.
“En pretempada vimos moitas cousas traballadas o curso pasado. As sensacións foron boas, grazas ao traballo de atrás, que os xogadores teñen sistematizados, e que a xente nova colleu ben”, sinalou Yago.
Eses xogadores novos sumaranse aos trece renovados, conformando “un plantel curto” pero que dará un salto de calidade, xa que segundo apunta o adestrador “veñen para achegar algo que criamos que non tiñamos”. A pesar de que hai que velos en competición oficial, o corpo técnico coñecía ben aos sete, polo que saben o que poden aportar ao equipo.
Que debuten este domingo ou non, será outra cousa, aínda que o plantel de vinte integrantes, e as lesións de Ube e Diego Rey, abren o abano de posibilidades, incluído a Primo, xa recuperado do seu golpe no maxilofacial.
Os once que saian de inicio terán como primeira pedra de toque un Club Silva SD moi reforzado e que destaca polo mesmo arma que todos os anos, o seu poderío físico. “Os seus puntos fortes son a estatura, as xogadas a balón parado e o seu saber facer defensivo, ademais reforzáronse ben”, explica o adestrador branquiazul.
Aproveitando “a sorte” de comezar en casa, desexo do corpo técnico, esperan realizar un encontro no que “levemos o peso do partido e aproveitemos as nosas oportunidades”. Con todo, o míster sabe que aínda queda “coller rodaxe en San Lázaro”, xa que en pretempada só xogaron un encontro.
Cun once que, a pesar de non estar establecido, si que teñen máis ou menos claro, Yago e os seus axudantes esperan que chegue o domingo para comprobar que o traballo realizado ata agora se materialice con puntos na competición real. O desexo é manter a dinámica de San Lázaro comezando, deste xeito, con moi bo pé.
