Santiago de Compostela, a 4 de Setembro de 2017.
Tres de tres. A SD Compostela logrou a súa terceira vitoria consecutiva tras superar no segundo encontro en San Lázaro a un gran Laracha. Nun partido no que o oficio superou ao bo xogo, os branquiazuis levaron os tres puntos, colocándose no segundo lugar da táboa con nove.
Tras unha primeira parte moi igualada, na que Álex Ares adiantara ao Compos e Ballesteros igualara, Primo anotaba o tanto da vitoria nun córner, no minuto 65.
Desde o comezo do encontro, a diferenza dos anteriores, xa se viu un fútbol máis trabado, sen dominio claro para ningún dos dous conxuntos. O Compos, menos preciso no pase, non era capaz de romper a muralla defensiva dos visitantes, os cales buscaban a rapidez arriba de Adrián Castro para xerar perigo.
Así, na primeira ocasión chegou o gol local. Un pase filtrado desde o medio era mal rexeitado polo central, caéndolle nos pés a Álex Ares. O mediapunta, tras avanzar uns metros, definía á perfección por baixo, adiantando aos seus no marcador.
Con todo, sen tempo para festexar, marcaron o empate. Enésimo balón en profundidade para Adrián, que esta vez foise de Uña, centrou raso forte e, ante o despexe de Lucas, Ballesteros pescaba o balón, para empuxalo á rede a portería baleira.
Co empate, o partido volveu pararse e, ata os últimos dous minutos, non veriamos máis achegamentos á área. Estes chegaron nunha contra remachada por Róber e un lanzamento de Ares desde a frontal que se foi arriba.
Con todo, á saída dos vestiarios, a dinámica cambiou. O Laracha saíu máis enchufado e ben puido adiantarse en varias ocasións. No 48, tras un saque de banda rápido, Adrián quedou só, cedeu para o seu compañeiro Patiño, pero este atopouse cun gran Lucas que despexou a córner. Mentres, tres máis tarde, de novo Patiño teríaa aínda máis clara, cun balón que lle chegou franco ao punto de penalti. Con todo, sen porteiro, mandouna arriba.
O Laracha perdoou, pero non o fixo así o Compos. Tras un córner que chegara dun paradón co pé de Chema a tiro de Álex Ares, o Compos anotaba o segundo. Uña, no segundo pau, remataba para o punto de penalti e alí, o gladiador Primo, controlaba e marcaba coa súa perna dereita.
Co gol, o Compos veuse arriba e puido sentenciar por dúas veces. Primeiro Róber durmíase cando tiña todo de fronte, dubidaba entre rematar e pasala a Álex Ares, despexándoa o central. E un minuto máis tarde, Chema atrapaba un tiro de Mon desde dentro da área.
Tras non materializar, o Laracha puido empatar, pero primeiro David García, ao pau, e despois Adrián Castro, mandando unha volea fóra, non eran capaces de empatar o partido. Ademais, nestes minutos, o Laracha quedaría con dous homes menos, tras unha vermella directa a Dávid, por unha entrada a destempo sobre Mon, e a segunda amarela a Migui, tras un agarrón nunha contra.
Coa superioridade, o Compos tería dúas ocasións moi claras, en senllos mans a mans de Primo e Casas, pero ambos se atoparon cun gran Chema.
Así, o resultado non variou e o Compos levou os tres puntos. Terceira vitoria consecutiva, que o sitúa no alto da táboa xunto ao Bergantiños, e que permite seguir soñando. Con nove puntos, os branquiazuis veranse as caras a próxima fin de semana contra o Villalbés.
FICHA TÉCNICA
2- SD Compostela: Lucas, Sergio Pereira, Cardeñosa, Uña, Naveira; Casas, Mon; Róber, Álex Ares (Saro, m.86), Rubén (Tomás, m.54); e Primo (Santi, m.90).
1- Laracha CF: Chema; Antonio, Angeriz, Álex Sánchez, Juan; David García, Migui; Ballesteros (Taibo, m.78), Patiño (Iago Novo, m.67), Alvarito (Souto, m.74); e Adrián Castro.
Goles: 1-0: Álex Ares, min. 27; 1-1: Ballesteros, min.31; 2-1: Primo, min.65.
Árbitro: Álvarez Calderón, colexio vigués. Amoestou a David García e Migui con cartón vermello. O primeiro directo e o segundo por dobre amoestación. Ademais, amoestou a Álex Ares, Sergio Pereira, Cardeñosa e Primo, polos locais, e Alvarito, Álex Sánchez, Juan e Souto, polos visitantes.
Incidencias: Partido da terceira xornada de Liga de Terceira División disputado no Estadio de San Lázaro ante 900 espectadores.
