- Os tres xogadores do Barbanza foron presentados na sede de Limpezas Salgado.
Santiago de Compostela, ao 11 de setembro de 2017.
A SD Compostela, tras a súa primeira derrota, xa pensa no partido que o enfrontará o vindeiro domingo ás 18 horas ante o Boiro. Os branquiazuis queren sacarse a espiña e por iso desexan que chegue canto antes o encontro. Antes diso, Rubén, Cardeñosa e Lorenzo pasaron revista á actualidade do club, na súa presentación.
Os tres futbolistas, que renovaron un ano máis a súa vinculación co Compos, estiveron acompañados por Ramón Salgado, xerente de Limpezas Salgado, Ramón Castro, director das relacións institucionais do club, e Javier Puñal, director de márketing da entidade.
Cardeñosa
O primeiro en falar foi o central, quen se tivo que retirar onte lesionado do campo no minuto 60. A pesar diso, Cardeñosa é optimista e espera estar dispoñible para o vindeiro domingo. “Foi un golpe na parte externa da coxa, similar ao do ano pasado, pero coa diferenza de que esta vez non me inchou e teño un rango de movemento moito maior, polo que se a evolución é boa e o doutor permíteo, poderei xogar contra o Boiro”, explica.
En canto á derrota de onte, un dos capitáns branquiazuis asegura que “é mellor perder 4-1 unha vez, que catro 1-0”. Analizando o encontro considera que “na primeira metade fomos superiores, tendo algunha ocasión máis, pero a partir da lesión de Primo, cun campo que non estaba tan ben como noutras ocasións e que levaba a un fútbol de pelexa, trastornounos bastante”. Ademais, despois da súa lesión, o equipo viuse obrigado “a un troco de sistema ao que tes que adaptarte e xusto neses minutos aproveitaron para adiantarse, e despois con espazos sentenciaron”. Aínda así, o central sentencia que “todos asinariamos este inicio”, con nove puntos de doce posibles.
Lorenzo
Pola súa banda, o porteiro padronés explicou que “o arranque do curso estivo ben e que esta derrota déixanos algo tocados, pero non hai que alertarse”. En canto ao rendemento asegura que o equipo está a encaixar moitos goles, pero que “o campionato acaba de empezar e queda moito para puír os erros. Temos moita marxe de mellora”.
Da súa situación persoal, a pesar de non contar con minutos, adestrará todos os días para estar nas mellores condicións cando lle toque a oportunidade.
Rubén
Por último, o extremo argumenta que nos partidos de visitante “hai que rascar como sexa porque hai campos moi complicados”. Ademais, asegura que non hai un equipo favorito esta tempada, polo que “poderemos estar arriba se melloramos os nosos erros”.
En canto á súa participación, despois de ser suplente por primeira vez, comenta que “adestrarei o máximo posible e tentarei achegar todo o que poida cando entre para ter as máximas oportunidades e minutos posibles”.
