- Os branquiazuis esperan volver gañar no fortín de San Lázaro.
- O Compos ten nove puntos, polos catro dun Boiro moi renovado.
Santiago de Compostela, ao 15 de setembro de 2017.
A falta dun adestramento, a SD Compostela ten xa preparado o seu plan para afrontar o duro choque que dirimirá o domingo ás 18 horas en San Lázaro contra o CD Boiro, un firme candidato ao ascenso.
Yago Iglesias e os seus mozos, tras a derrota contra o Racing Villalbés, buscan recuperar a senda do triunfo ante un rival que lles obrigará a dar “o 200%”, tal como sinala o técnico. “É un equipo de Segunda B, deportivamente falando”, dixo o adestrador, asegurando tamén que, xunto ao Bergantiños, “ten o mellor plantel de longo”. Por iso, “non lles temos medo, pero si moito respecto”, aclarou o ribeirense.
En relación cos xogadores boirenses, Yago destacou a “Igor de Souza, que vén dunha Primeira División estranxeira e que aquí xogou en Segunda; xente de nivel no medio, como Yahvé ou Pillado, e contrastada como Miki, que chega do Pontevedra”. Segundo o adestrador, “teñen moito nome e con esa primeira vitoria lograda a semana pasada, deulles confianza para continuar”. Ademais, en fronte terán a un “técnico con moita experiencia na categoría e en playoff, que nos coñece moi ben, do mesmo xeito que nós a el”, asegura.
Con todo, o técnico aclarou que “temos que facer o noso partido e a partir de aí San Lázaro é San Lázaro”. Yago Iglesias confía na maxia do seu estadio e no apoio duns espectadores, que esperan que superen o milleiro.
No partido poderá participar Cardeñosa, que xa adestrou onte e hoxe, pero non así Diego Rey, Ube e Primo, que seguen coas súas respectivas recuperacións. Os restantes traballaron durante toda a semana para “ver os erros do domingo pasado, os cales non debemos cometer e a partir de aí, preparar duramente o duelo contra o Boiro”, detallou o técnico.
A hora e media de preparación que lle resta servirá para ultimar os últimos detalles do partidazo do domingo, un encontro contra un rival de superior categoría.
