Santiago de Compostela, a 30 de setembro de 2017.
A SD Compostela está preparada para afrontar, por segunda semana consecutiva, un partido como visitante en campo de herba artificial. Esta vez, se cabe, o reto é maior, xa que enfronte terán a un dos principais candidatos ao ascenso no Grupo 1 da Terceira División, o Bergantiños.
Por tanto, o partido deste domingo ás 17.30 nas Eiroas enfrontará a dous dos conxuntos punteiros do grupo, ambos con similares propostas de xogo e que, dada a súa proximidade xeográfica, levarán ao campo a unha gran afluencia de público.
Segundo o adestrador santiagués, Yago Iglesias, o Bergan é “un equipo para quedar primeiro, que á continuidade do curso pasado, súmanlle xogadores de moita experiencia e calidade como Baleato e Rivera, como o resto do plantel, como Facal, Cristopher ou Granada”.
Ademais, explicou que “o campo ao que imos é moi diferente ao noso e iso sempre nos custa un pouco”, aínda que confía en “expor o noso partido e evitar que eles leven a súa idea de xogo”. Nisto último inflúe o gran encontro disputado o sábado pasado contra o Barbadás. A tranquilidade do triunfo e a boa imaxe mostrada son as liñas para seguir.
“O outro día gañamos fóra, dando boa imaxe, sendo contundentes, xerando ocasións e sen encaixar”, comentou Yago, e por iso “debemos seguir sendo rochosos, un conxunto que non concede, porque nun partido deste tipo é fundamental a presenza defensiva, ser un equipo compacto e aguerrido”, aclarou.
Para esta ocasión, Yago poderá contar xa con Primo, que adestrou como o resto de compañeiros e que xa está dispoñible ao 100% para xogar. Ao dianteiro sumaránselle o resto de xogadores que entraron na convocatoria o sábado pasado, a excepción de Alberto. “Cada semana custa máis, porque o equipo vai mellorando e collen o ritmo que nós queremos”, concluíu.
Os 16 elixidos buscarán o reto de superar a un gran equipo, o cal está situado en postos de playoff. Precisamente, ese é o noso soño e para entrar nel, sumar nas Eiroas será un gran paso.
