Santiago de Compostela, ao 25 de setembro de 2017.
A xornada das categorías inferiores da SD Compostela trouxo consigo dúas vitorias, as do filial e do alevín, tres derrotas e un empate do Cadete. Salvo o Nacional, que está en descenso, e o alevín, que se sitúa terceiro, o resto de conxuntos viven tranquilos na zona media da clasificación.
O filial, tras sumar o seu primeiro triunfo o domingo pasado, segue coa súa boa xeira ao superar ao Atlético Pino, en Santa Isabel, por 5-1. Os nosos foron moi superiores ao seu rival, poñéndose por diante no marcador nos primeiros compases do choque. Foi Seijo, que repetiu á media hora de xogo, o que marcou os dous tantos iniciais. Aínda na primeira, despois do gol visitante, Moure ampliaba de novo diferenzas, as cales foron pechadas con outro dobrete, o de Mateo, nos minutos 79 e 83. Con este resultado seguen escalando na táboa, situándose en oitavo lugar con seis puntos.
En canto ao xuvenil Nacional, non puido sumar por segunda semana consecutiva, ao caer derrotado na súa visita ao Choco por 3-2.
Nun partido no que os branquiazuis estrearon novo equipamento, patrocinada por MC Interiorismo Modular, non comezaron o encontro enchufados. Saíron desorganizados e pouco precisos nos pases, o que lle permitiu aos visitantes poñerse por diante. Con todo, os canteiráns conseguiron igualar nunha xogada a balón parado culminada por Adrián, pero pouco lles durou a alegría, xa que nun novo descoido, os locais marcaron o segundo.
Xa na segunda parte, o Compos foi moi superior ao rival, dominando claramente o partido e no que as ocasións eran visitantes. A máis clara chegaría tras un penalti cometido por un defensor local ao darlle coa man, coa mala sorte de que o meta do Choco detivo a pena máxima. E as malas novas aumentaban co terceiro tanto local. Nun arreón final, os santiagueses marcaron o segundo, tanto obra de Anxo, e ben puideron empatar coas últimas ocasións, pero o marcador xa non se moveu e os tres puntos quedaron na casa.
Con esta derrota, o Nacional cae a postos de descenso, lugar do que tentarán saír a próxima semana nun partido moi importante contra o Lugo.
Do mesmo xeito que o Nacional, o xuvenil B caeu derrotado, no seu caso ante o Villestro, en casa, por un gol a dous. Un dobrete de David Filgueira deixou en nada o tanto de Pablo Otero, que supoñía o empate no minuto 36.
Si puido sumar o Cadete, que segue co seu bo arranque ligueiro, situado na zona tranquila da táboa. Este domingo conseguiu sumar un punto na súa difícil visita ao Lalín, empatando a ceros.
A terceira derrota da xornada sufriuna o Infantil despois de perder na casa contra o Boiro por un tanto a tres. Os branquiazuis empataron o encontro ao comezo do segundo tempo, pero neste período os do Barbanza gañarían o choque con outros dous tantos.
Por último, o Alevín segue imparable en Liga. Este sábado logrou o seu segundo triunfo ante a SD Negreira por 4-3. Os tres puntos lográronos nun partido moi igualado, remontando o 0-1, e competindo ata o último minuto para manter a vantaxe cultivada. Foi un encontro con moita implicación e compañeirismo de todo o grupo. Con seis puntos están entre os tres equipos que gañaron os seus dous encontros.
