Santiago de Compostela, ao 2 de outubro de 2017.
Nunha fin de semana en que dous equipos máis entraron en competición, as categorías inferiores viviron unha xornada con dúas vitorias e un empate. A primeira delas foi do xuvenil de Liga Nacional e a outra do Infantil B, na súa estrea ligueira.
O filial segue coa súa boa xeira e suma por terceira semana consecutiva. Despois de dúas vitorias consecutivas, o Zona Vella logrou un empate na súa visita ao Cire Melide. O conxunto local púxose dúas veces por diante no marcador, diferenza que foi neutralizada polos nosos cos tantos de Mateo e Alejandro.
A primeira das vitorias da fin de semana chegou co Nacional, a cal supón tamén o seu primeiro triunfo en Liga. Os xogadores de Marcos Donnici superaron con claridade ao Lugo por 2-0, recuperando a solidez defensiva mostrada nas primeiras xornadas do campionato. Yago Torrente, no 54, e Daniel Abeijón, no 83, foron os goleadores dos branquiazuis, que escalan ata a metade da táboa con estes tres puntos.
Pola súa banda, o xuvenil B perdeu por 4-1 ante o Atlético Riveira, líder sólido da categoría. O conxunto local foi superior e penalizou os erros dos nosos. Na segunda metade, na que chegaría o gol de Xacobo Insúa, os branquiazuis melloraron moito no seu xogo pero non conseguiron recortar máis o marcador.
Outro conxunto que encaixou catro tantos foi o Cadete, no seu caso, na casa ante o Sálvora, que o supera na clasificación. Os visitantes adiantáronse con dous tantos nos primeiros trinta minutos, vantaxe que foi neutralizada polos nosos con dous goles de Etienne Lorenzo e Martín Díaz, ao comezo do segundo tempo. Con todo, noutros dous arreóns ao final do choque, os visitantes levaron os tres puntos.
O Atlético Riveira tamén foi o verdugo do Infantil A, ao que lle gañou por 2-6 na súa visita ao campo da Merced. Os branquiazuis foron sempre por detrás no marcador ante o líder, estando preto do punto só na primeira metade, cando anotaron o 1-2.
Mellor sorte correu o Infantil B que se estreou na liga cun claro triunfo por 1-4 contra o Cruces. Os goles chegaron grazas á intervención de Pablo, por dúas veces, Héctor e outro en propia porta. Neste encontro hai que destacar a actuación dos alevíns que participaron nunha categoría superior. Con este resultado colócanse na parte alta, onde tamén está o Bertamiráns, rival para esta fin de semana.
Precisamente, o conxunto alevín non puido seguir coa súa boa xeira e caeu derrotado por un gol a catro ante o Rácing San Lorenzo, aínda que cos seus seis puntos seguen no terceiro chanzo da táboa.
Por último, o benxamín debutou con peor resultado, xa que perdeu por cero goles a seis ante o Milladoiro, nun encontro no que notou a falta de efectivos.
