-
Alberto Freire, Sobrido e Primo anotaron os goles dos blanquiazuis.
Santiago de Compostela, a 12 de Outubro de 2017.
Un novo reto superado. No Manuel Candocia, o Compos logrou un triunfo de mérito, merecido, grazas a un encontro no que se volveu a demostrar a súa solidez defensiva e a gran efectividade que ten na parte dianteira.
Na primeira metade, os nosos puxeron terra polo medio cos tantos Alberto Freire e Sobrido e, pese ao penalti transformado por Gerardo no sesenta, sentenciaría á contra cun tanto de Primo a portería baleira.
Seguindo a dinámica dos últimos partidos de visitantes, a pesar da gran cantidade de cambios no once do Compos, o equipo mostrouse moi seguro en defensa. A base de defender e saír rápido tras roubar, o equipo mostrábase cómodo. Ademais, cando tiña o balón, non o perdía.
Así, con esta claridade, chegou o primeiro gol. Balón para Sobrido en banda, este foise do seu marcador por liña de fondo, cedeu atrás e aí apareceu Alberto Freire, titular hoxe, para empuxar o balón á rede.
Co tanto, o equipo gañou en tranquilidade e puido aumentar a renda nun roubo de balón, que acabou nos pés de Róber, pero o seu tiro sacouno Javi a córner coa punta dos dedos.
Tras esta ocasión, o Somozas tería a réplica en dúas xogadas de centros, pero Duque, que se atopou a man de Lucas, e Uzal, non conseguiron a igualada e a continuación o Compos conseguía o segundo.
Róber e Santi gañaban un balón bombeado, o porteiro quedaba a media saída, e Sobrido, moi listo, picaba o balón ao fondo da portería.
O tanto chegaría no minuto 36, pero xa non veriamos máis ocasións ata o descanso, debido á gran solidez defensiva de ambos os conxuntos. Á volta dos mesmos, o partido seguiría polos mesmos derroteiros, ata que no minuto 60 o colexiado indicaba un penalti de Naveira sobre Gerardo. O propio dianteiro era o encargado de tiralo e anotalo.
Co gol, o equipo local veu arriba e comezou a apertar a base de balóns colgados á área. Mentres tanto, os nosos xeraban máis perigo a través de balóns baixados polos dianteiros. Nunha deles, Róber baixaba o balón na área coa cabeza e soltaba un zurdazo que saíu rozando o pau. Lambendo o pau tamén saíu un tiro de Mon desde a frontal no 74.
Pola súa banda, o Somozas encomendábase á figura de Fran Monroy. O dianteiro puido marcar en dúas accións, un tiro que tapou Cardeñosa co corpo e unha volea aérea que saíu rozando o traveseiro.
Con todo, o gol chegaría na outra portería no 88. Alberto controlaría no medio, cedía para Ube e este picábaa por encima dos centrais para un Primo que entraba en carreira. O gladiador, só, regateaba ao porteiro e marcaba a portería baleira. Era a sentenza.
Por cuarta semana consecutiva os tres puntos eran branquiazuis. Un novo reto superado nunha visita complicada e toca pensar xa non Barco, outro serio candidato ao ascenso. San Lázaro ten que ser un fortín o domingo.
FICHA TÉCNICA
1- UD Somozas: Javi Seral; Pacheco, Hugo (Edu, m.76), Pablo, Álex Pérez; Salva Rivas (Monroy, m.45), Uzal; Duque (Kevin, m.69), Gerardo, Álex Rey; e Silas.
3- SD Compostela: Lucas; Sergio Pereira (Saro, m.52), Cardeñosa, Álvaro Casas, Naveira; Mon, Alberto Freire; Róber, Álex Ares, Sobrido (Ube, m.80); e Santi (Primo, m.69).
Goles: 0-1: Alberto Freire, min.25; 0-2: Sobrido, min.37; 1-2: Gerardo, min.61; 1-3: Primo, min.88.
Árbitro: Del Río Amor, colexio coruñés. Amoestou ao adestrador local Michel Alonso e a Álex Ares, Mon e Saro, polos visitantes.
Incidencias: Partido da novena xornada de Liga da Terceira División disputado no Manuel Candocia ante 300 espectadores, a gran maioría santiagueses.
