Santiago de Compostela, a 13 de Outubro de 2017.
Antes dos encontros da fin de semana, as categorías inferiores de maior idade, xuvenís, cadetes e infantís, tiveron unha xornada intersemanal na que se lograron dous triunfos, un empate e unha derrota.
O peor resultado sería o encaixado polo xuvenil de Liga Nacional que se viu superado por un gran Deportivo B. O conxunto coruñés rompeu a boa xeira dos branquiazuis cun resultado avultado, 5-0. Os dous tantos de penalti na primeira media hora fixeron moito dano aos nosos, que recibiron tres goles máis na segunda metade.
Agora, tentarán recuperar sensacións en casa, no Municipal das Cancelas, o domingo ás 12.00 horas contra a UD Santa Mariña.
Pola súa banda, o Xuvenil B sacou un gran empate na casa contra un dos candidatos ao ascenso, o Xuventú Aguiño. Un tanto de Marcos Andrade, no minuto 74, serviu para que os branquiazuis sumasen un importante punto que os mantén na zona intermedia da táboa.
Agora, o sábado veranse as caras contra o pechacancelas, o AD Manuel Peleteiro, contra o que se enfrontarán ás 16.30 horas no campo do propio colexio.
A primeira vitoria do festivo logrouna un inspirado equipo Cadete, que volveu gañar fóra ante a UD Bastavales, conxunto ao que adianta na clasificación. Tras unha primeira parte sen goles, Etienne Lorenzo e Gerardo Lago anotarían os tantos que permiten aos santiagueses situarse na sexta praza. O próximo encontro será o domingo ás 9.30 horas, nas Cancelas, contra a SD Villestro, segundo clasificado.
O outro que logrou o triunfo foi o Infantil A, que conseguiu reverter os malos resultados cultivados nos últimos encontros vencendo 3-0 á SD Dubra. Os branquiazuis anotaron dous tantos na primeira metade do choque e sentenciaron no 68. Agora marchan duodécimos e enfrontaranse ao CD Rois, na Braña, o sábado ás 11.30 horas.
En canto aos alevíns, o A enfrontarase a Victoria, o sábado ás 11.30 horas en Santa Isabel e o B xogará contra a SD Villestro, unha hora antes, no mesmo campo.
Por último, os benxamíns buscarán o seu primeiro triunfo o sábado ás 19.30 horas, en Santa Isabel, contra o Victoria FC.
