-
O Barco chega a San Lázaro tras vencer por 6-0 ao Barbadás.
-
O Compos quere lograr o récord de cinco vitorias consecutivas.
Santiago de Compostela, a 14 de Outubro de 2017.
A semana frenética chega ao seu fin esta fin de semana cun novo reto para a SD Compostela, xa que se enfrontará a outro candidato ao ascenso, un CD Barco que chega a San Lázaro despois de golear ao Barbadás.
O conxunto do Barco de Valdeorras, situado na cuarta posición, xa conseguiu romper o curso pasado o fortín de San Lázaro, polo que a tarefa será aínda máis complicada, ao que se suma o cansazo acumulado da semana.
O técnico santiagués define ao rival como un conxunto que “ten moita pólvora, moi desequilibrante do mediocampo para adiante e con xogadores doutra categoría”. Entre eles está Mitogo, dianteiro que regresa a Santiago tras xogar a primeira volta do curso pasado. “Mañá saudarémolo, pero esperemos que non faga un bo partido”, comenta Yago.
A gran dianteira do Barco, complica a tarefa defensiva nun campo como San Lázaro, o cal “é máis amplo e sempre haberá máis espazos, máis desaxustes”, pero, segundo apunta o adestrador, “desexamos ter un partido aquí con portería a cero”.
En canto ao once que poida sacar, o corpo técnico esperará a mañá para saber como está o equipo, aínda que asegura que “a xente está ben e xa demostramos o xoves que podemos tirar de rotacións”. Algunhas delas, como a variante de Álvaro Casas no posto de central, poderán verse de novo se as circunstancias o permiten. “É unha das variantes que podemos ter, pero non só esa, senón tamén con outros xogadores noutros postos, como o caso de Mon. Ao longo da semana, probamos situacións diferentes entre os 20 xogadores que temos, porque é un plantel curto e sempre se poden dar imprevistos e hai que anticiparse”, argumenta Yago.
Este plantel está desexoso de que chegue o domingo, xa que enfronte terán un rival como o Somozas, candidato ao ascenso, e por xogar en San Lázaro. Así, técnico e xogadores quixeron facer un chamamento á afección para que “estea co equipo, que anime, que axude porque queremos facer un gran partido ante un gran rival”.
Co público actuando como xogador número doce, o fortín de San Lázaro debe ser máis forte aínda e así axudar a superar este novo reto, que traería consigo un récord de triunfos con Yago Iglesias ao mando. Seguir coa xeira de resultados pasa por facerse fortes na casa.
