-
Rubén e Cardeñosa, por sanción, e Álex Ares e Sergio Pereira, tocados, son baixa.
-
O partido do curso pasado acabou con vitoria visitante por 2-4.
-
Na anterior semana de tres partidos, o Compos sumou 7 puntos.
Santiago de Compostela, a 31 de Outubro de 2017.
A Terceira División non para. Por segunda semana no mes, os conxuntos terán que xogar tres encontros en tan só sete días. Tras o empate ante o Arousa, os branquiazuis baixarán ao sur para enfrontarse a un Alondras que camiña con paso firme na liga.
No enfrontamento, o Compos terá que adaptarse a un campo de herba artificial, o do Morrazo, aínda que a vitoria do curso pasado axuda a ter mellor sensacións. Ademais, os sete puntos logrados na anterior semana frenética levan ao equipo a tentar igualar eses algarismos.
Esta circunstancia de tantos partidos seguidos non gusta moito no corpo técnico santiagués, xa que “temos os xogadores que temos, non nos dedicamos ao 100% a isto, é un enorme desgaste e non tes tempo para preparar os encontros”. Aínda así, o técnico tamén asegura que é bonito porque “os xogadores se senten como profesionais”, os cales asinarían “cos ollos pechados” os sete puntos da semana anterior.
Ademais do cansazo físico, o equipo terá que superar as catro baixas que ten. Rubén e Cardeñosa están sancionados, mentres que Álex Ares, cun proceso vírico, e Sergio Pereira, que onte sentiu molestias, tampouco poderán disputar ningún minuto.
Os dezaseis restantes terán enfronte a un conxunto “moi intenso na súa casa, que mantivo a moitos xogadores do ano pasado e que fichou xente de nivel, con pasado no Compos, como son Iván Pérez ou Jesús Varela”, explica Yago Iglesias.
En canto ao campo, a pesar de ser de herba sintética, o técnico confesa que é “un campo moi bo” e o curso anterior xa se lle deu moi ben. O tempo tamén pode xogar ao noso favor, xa que “se chove o suficiente, estará máis rápido e é mellor para nós”.
Con todo, os resultados lonxe de San Lázaro están a funcionar e isto xera optimismo nun plantel que busca superar un novo reto e igualar a dobre experiencia: a da semana frenética anterior e o resultado do partido do ano pasado.
