-
Mon marcou un gran tanto de falta.
-
Róber, Alberto Freire e Primo acabaron o partido tocados.
Santiago de Compostela, a 1 de Novembro de 2017.
Novo punto para seguir pelexando na parte alta, nun choque con moitas lesións. A SD Compostela, nun partido no que dominou de principio a fin, levou só un punto ante un insistente Alondras, no que se notou moito a entrada de Mauro na segunda metade e no que os paróns nesta parte polas lesións, marcaron moito.
Na primeira parte do choque, na que fixemos un fútbol espectacular, Mon adiantaría aos nosos, pero o propio Mauro sería o encargado de igualar o choque nos últimos minutos do mesmo.
Entre semana, como ante o Somozas, chegou o tempo das rotacións. O Compos saltou ao campo do Morrazo con cinco caras novas, unha delas, Alberto Freire, que entrou a última hora pola lesión de Róber no quecemento, pero coa mesma premisa de todos os partidos de visitante: solidez defensiva e velocidade arriba.
Así, moi seguros atrás, o Compos comezou o encontro xerando as primeiras ocasións de perigo. No minuto nove, Tomás remataba de cabeza no segundo pau un córner botado por Mon e o balón saía rozando o traveseiro.
O dominio era total e a pesar de que o equipo non conseguía culminar as contras perigosas que tiña, acabou por anotar nunha xogada a balón parado. Desde a frontal, Mon poñía o balón na escadra da portería de Hortal. O lanzamento coa zurda foi perfecto, imparable para calquera porteiro.
Co tanto, o Compos tiña o que merecía, aínda que antes do descanso puido chegar o empate nunha xogada tamén de falta. Iván Pérez pegáballe forte e raso desde o pico da área e o balón, tras ser rozado por un defensa, golpeaba na parte exterior do poste.
Á saída dos vestiarios, ambos os conxuntos saíron máis tranquilos e iso derivou nun encontro con máis control e menos perigo nas áreas. Ademais, as lesións de Alberto Freire e Primo, que foron substituídos por Santi e Diego Rey, arrefriaron aínda máis o choque.
O primeiro achegamento chegaría case no minuto 70, cando Santi recibía en profundidade e deixaba o pase da morte atrás, pero non chegou Sobrido e despexou a defensa.
Por contra, os locais, no seu primeiro achegamento da segunda metade, anotaría o empate. Tras xogada por banda esquerda, Mauro recibía no punto de penalti e colocaba o balón preto do poste da portería de Lorenzo, quen non puido facer nada por evitar o empate.
O propio Mauro tería o segundo no desconto, despois dunha gran xogada individual, pero o seu tiro desde a frontal saía rozando o pau da portería.
Esta segunda oportunidade do revulsivo local sería a última do encontro, xa que no resto do engadido non se viron máis achegamentos. Morría así un encontro no que o Alondras soubo aproveitar a súa opción para igualar a contenda. Mentres, o Compos leva un punto dun campo complicado, co cal segue nos postos altos. Con todo, haberá que analizar a peaxe desta viaxe, xa que Róber, Alberto e Primo acabaron o encontro tocados.
FICHA TÉCNICA:
1- Alondras CF: Hortal, Jesús (Mauro, m.56), Aram, Agujetas, Varo; Abel (Pablo Salgueiro, m.73), Champi (Michael m.84); Pardavila, Iván Pérez, Álex Rey; e Gabri.
1- SD Compostela: Lorenzo; Saro, Álvaro Casas, David Uña, Naveira; Ube (Samu, m.79), Mon; Sobrido, Alberto Freire (Santi, m.59), Tomás; e Primo (Diego Rey, m.64).
Goles: 0-1: Mon, min.29; 1-1: Mauro, min.81.
Árbitro: Pereira Ferreiro, colexio lucense. Amoestou a Gabri, Iván Pérez, Aram e Mauro, polos locais; Alberto Freire, David Uña, Tomás e Samu, polos visitantes.
Incidencias: Partido da décimo terceira xornada de liga de Terceira División disputado no campo de Fútbol do Morrazo ante 500 espectadores, boa parte deles chegados desde Santiago.
