-
Sergio Pereira, Alberto Freire e Róber son baixa para o partido.
-
O Compos leva tres vitorias en casa en seis encontros.
Santiago de Compostela, a 4 de Novembro de 2017.
Dous empates, en dúas xornadas. Este é, ata o momento, o balance de resultados da SD Compostela nesta semana frenética, polo que o obxectivo é volver sumar de tres para facer bos os dous empates ante Arousa e Alondras. Lograríase así, ademais, romper a xeira de dous encontros sen gañar no fortín branquiazul.
O partido do mércores, a pesar do bo resultado cultivado, deixou varias feridas de guerra, que provocan que Yago Iglesias non poida contar con todos os seus efectivos. A Sergio Pereira, que segue sen estar ao 100%, únenselle Alberto Freire, cunha escordadura de xeonllo, e Róber, cunha sobrecarga muscular. A maiores, “David Uña está entre algodóns e veremos como está o domingo”, explicou Yago. Quen se está perfecto, tras o seu mareo do outro día, é Primo.
Estes xogadores serán os encargados de acabar a semana sumando de tres en San Lázaro. O adestrador asegura que “os resultados en casa poden parecer máis negativos que fóra, pero hai que analizar os rivais que viñeron”. Por iso, comenta que para realizar unha valoración dos resultados en casa haberá que esperar ao final da primeira volta, ou mesmo algo máis. Con todo, “a idea de xogo, tanto en casa como fóra, está clara e o que queremos é dar un salto de calidade nos resultados en casa”, asegura.
En respecto ao ao rival, o técnico aclara que, a pesar do que poida dicir a clasificación, “levan unha idea vistosa de xogo, con bo trato de balón e moita calidade do mediocampo para adiante”. Por iso, esperan que queiran dar a sorpresa, do mesmo xeito que logrou na Copa Deputación, polo que “temos que ser un equipo serio, responsables coa posición na que estamos e, sobre todo, porque estamos diante da nosa afección”.
Do mesmo xeito que ante ao Arousa, o público debe ser ese xogador número 12 que axude a lograr unha vitoria ante o Noia, un triunfo que pode ser aínda máis bo se pensamos que hai enfrontamentos entre rivais directos. A partir das 17.00 horas, o tapete de San Lázaro ditará sentenza. Todos queren facer bos os dous empates anteriores.
