- Este domingo haberá un forno na porta 3 de entrada á Tribuna do Estadio.
- Os 7 gañadores coñeceranse o próximo 22 de decembro.
Santiago de Compostela, a 30 de Novembro de 2017.
A porta de acceso a Tribuna de San Lázaro (Porta 3) estará acompañada este domingo dun forno de papel onde todos aqueles que así o desexen poden depositar os seus desexos. A SD Compostela colabora así con esta iniciativa de Forno dos Soños, unha proposta que surxe dun curso de emprendemento do Concello de Santiago.
O funcionamento é moi sinxelo. Na porta do estadio haberá un forno de papel, que funciona como urna, para que todo o mundo deposite o seu soño. Repartirán máis de 500 fornos por toda a cidade e o día 22 de decembro farán un evento no que se premiarán 7 soños escollidos de todos eses fornos. Os/As gañador@s serán premiados cun dos seus servizos (unha sesión de fotos, un tocado, asesoramento para decorar o seu espazo…).
Polo tanto, invitamos a todos os asistentes ao encontro a que depositen o seu soño no forno alí presente. Nos tamén o faremos, temos claro o noso desexo. Peregrinamos cara un obxectivo e precisamos de vós para acadalo.
Forno dos Soños
Este proxecto está formado por 7 emprendedores, 7 forneiros e forneiras con 7 soños que están a facer unha campaña publicitaria para poñer en valor o emprendemento co fin de dar a coñecer o seu traballo. Un fotógrafo, dúas artistas textiles, unha deseñadora de tocados,un deseñador especialista en iluminación, unha organizadora de eventos e unha organizadora de espazos conforman o equipo dunha plataforma que pretenden que sexa viral.
Queren que esta iniciativa se faga viral, estar en todas partes: nas redes sociais, en espazos físicos, medios de comunicación, aquí, alí e acolá.. Se alguén quere apoiar o seu proxecto poderá contactar con eles no correo ofornodossonhos@gmail.com ou visitar as súas redes sociais.
