Santiago de Compostela, a 4 de Decembro de 2017.
A Sociedade Deportiva Compostela realizará o próximo mes de xaneiro a primeira edición do seu Campus de Nadal. Do 2 ao 5 de xaneiro, todos os nenos de entre 4 e 9 anos que así o desexen poderán participar nunha nova actividade da entidade, patrocinada nesta ocasión por Segundo Rey.
Neste Campus, que se celebrará no pavillón de Pontepedriña en horario de 10.00 a 14.00 horas, os nenos serán adestrados por diferentes monitores, xogando ao fútbol, pero tamén aprendendo valores moi importantes para o seu crecemento como a amizade ou o compañeirismo. Ademáis, todos os días terán a visita dalgún xogador do primeiro equipo e sortearanse diferentes agasallos.
Para inscribirse, deben cumprimentar o díptico que poderán atopar nas oficinas do club ata o próximo 18 de decembro. O prezo é de 80 euros o xeral, 65 para federados, 60 para abonados ou fillos de abonados e 40 para xogadores da base ou irmáns de inscritos. A maiores poderán contratar o servizo de comida por 7 euros diarios en El Corte Inglés.
Desde o club quérese reiterar que esta é outra iniciativa para os máis novos co fin da promoción e crecemento para a canteira, tentando xerar a máxima ilusión desde pequenos no deporte do fútbol. A entidade quere ser o equipo referente e crear tendencia como entidade, sendo un exemplo neste aspecto.
OFRENDA
Doutra banda, o club realizará este mércores a tradicional ofrenda ao Apóstolo Santiago ás 12.00 horas na Catedral. Todo o persoal e o corpo técnico do primeiro equipo, así como membros das categorías inferiores estarán presentes neste acto relixioso no que o club lle pedirá sorte ao Apóstolo para esta tempada. No oficio tamén veremos funcionar ao Botafumeiro.
