-
Directiva, corpo técnico, primeiro plantel e membros da canteira participaron na ofrenda.
Santiago de Compostela, ao 6 de decembro de 2017.
A Sociedade Deportiva Compostela realizou hoxe a tradicional ofrenda ao Apóstolo Santiago na Catedral santiaguesa. A entidade, da man do seu presidente, Antonio Quinteiro, solicitou o amparo de Santiago para lograr as metas desta tempada, nun acto ao que acudiron a directiva, corpo técnico e plantel do primeiro equipo ao completo, así como membros das categorías inferiores do cadro branquiazul.
O oficio arrincou ás doce da mañá, cos actos protocolarios. No medio da misa, impartida polo bispo auxiliar de Santiago de Compostela, Don Jesús Fernández, o máximo dirixente do club dedicou unhas palabras ao Apóstolo. “Queremos pedirche o amparo para que estes mozos logren os seus obxectivos. Non só para o primeiro equipo, senón tamén para os membros da base, que levan con orgullo o teu nome e o do noso club, e para os afeccionados, sen o que non tería ningún sentido o noso esforzo”, declarou. Ademais, comprometeuse, en representación da directiva, levar con orgullo o nome de Santiago polos campos de Galicia e España e agradeceu a invitación á catedral.
Pola súa banda, o bispo confesou que “traballando en equipo, os talentos persoais multiplícanse e así os soños sempre son posibles”. Con isto en mente, Don Jesús pediu de corazón que ogallá o equipo logre as súas metas e felicitounos polo que levan traballado e conseguido.
Para clausurar o acto, os asistentes puideron gozar do botafumeiro en acción. Despois, o equipo da man do seu capitán, Mon Vives, e o seu adestrador, Yago Iglesias, entregáronlle ao bispo, a modo de ofrenda, unha camiseta co número 25, polo día de Santiago, e co nome, “Ao patrón Santiago”, e unha bufanda do equipo, a cal colocou o presidente sobre os ombreiros do Apóstolo. Por último, realizaron unha foto conxunta no centro da capela.
