-
O Compos suma o seu oitavo triunfo consecutivo tras superar ao Racing Club Villalbés por 3-0.
-
Todos os tantos chegaron nunha gran segunda metade.
Santiago de Compostela, a 28 de Xaneiro de 2018.
Este Compos segue lanzado. Os branquiazuis superaron esta tarde ao Racing Club Villalbés por 3-0 e sumaron deste xeito o seu oitavo triunfo consecutivo, o cal lle axuda a manterse no alto da táboa con 54 puntos.
Tras unha primeira parte moi igualada, os nosos deron un paso adiante na segunda metade na que foron moi superiores e cando chegarían os tres tantos, obra de Álex Ares, Tomás e Diego Rey.
O Compos saltou hoxe a San Lázaro co seu once de gala e coas ideas claras, pero o gran nivel do rival evitou que os nosos puidesen producir o xogo doutras ocasións. Unha presión alta e as saídas á contra complicaban aos branquiazuis que tardaron en atopar a tecla.
Así, nunha primeira metade moi igualada, a máis clara da primeira media hora foi para o Racing Club Villalbés cunha vaselina de Jose Varela nunha contra que atallou de maneira soberbia Lucas. O meta tamén apareceu nun tiro de Villares noutro contragolpe xerado tras unha acción moi protestada pola bancada.
Con todo, a máis perigosa dos primeiros 45 minutos foi para os nosos nun lanzamento de Álex Ares, tras centro raso de Naveira, que rozou un defensa e foise lamendo a escuadra da portería de Marcos Souto. Nos últimos instantes, o Compos tamén tería outros achegamentos, apoiados pola forza do seu público, pero non conseguiu perforar a meta visitante.
Á volta dos vestiarios, o fútbol cambiou por completo. A tónica dos últimos minutos mantívose e o Compos comezou a dominar co balón. A través de longas posesións o tanto era cuestión de tempo e este chegou no minuto 55.
Os nosos roubaron o balón, Róber cedeu para Mon, este abriu banda para Álex Ares e o mediapunta, tras encarar cara a dentro, soltou un gran zambombazo que pegou nun defensa e que superou a Marcos Souto por encima.
O primeiro tanto espoleou aos nosos e dez minutos despois chegaría o segundo nunha contra de libro. Álex Ares buscou ao espazo a Primo, quen gañou o esférico aos dous centrais, abriuna para a chegada de Diego Rey, recentemente entrado ao partido, e este deu o pase para que Tomás, tras unha longa carreira, marcase a pracer.
O segundo gol foi a rúbrica ao dominio local tras a saída do descanso e, a pesar de perdoar nalgúns achegamentos, no minuto 83 anotaría o terceiro. O gladiador Primo gañaba o balón, outra vez, aos centrais, cedía desde a liña de fondo para Róber e este daba unha gran asistencia para a entrada do rexurdido Diego Rey, quen controlou e fusilou ao meta cun gran disparo ao segundo pau. Era a sentenza.
A pesar de que o Villalbés tivo unha boa ocasión nun man a man de Villares que sacou Lucas, o marcador xa non se movería e os tres puntos volveron quedar no fortín branquiazul nun novo encontro coa portería a cero.
Con este resultado, o Compos iguala o goal average contra os chairegos e suma xa o seu oitavo triunfo consecutivo para acomodarse no alto da clasificación con 54 puntos achegándonos un pouquiño máis ao noso soño. A partir de mañá toca pensar na difícil visita contra o CD Boiro.
FICHA TÉCNICA:
3- SD Compostela: Lucas; Saro, Cardeñosa, Álvaro Casas, Naveira; Tomás (Rubén, m.87), Mon; Álex Ares (Ube, m.74), Santi (Diego Rey, m.62), Róber; y Primo.
0- Racing Club Villalbés: Marcos Souto; López, Xusto, Antonio, David Buyo (Álex Pérez, m.72); Javi Varela (Pablo Vivero, m.72), Make (Vérez, m.86); Jose Varela, Villares, Rubén Gómez; y Sergio.
Goles: 1-0: Álex Ares, min.55; 2-0: Tomás, min.64; 3-0: Diego Rey, min.83.
Árbitro: Rodríguez Campos, colexio coruñés. Amoestou a Naveira e Tomás, polos locais, e a Jose Varela e a Antonio, polos visitantes.
Incidencias: Partido da vixésimo terceira xornada de Liga de Terceira División disputado no Estadio de San Lázaro ante 850 espectadores.
