[cs_video column_size=”1/1″ video_url=”https://youtu.be/0TGpibkVjf8″ video_width=”500″ video_height=”250″][/cs_video]
-
O Compos enfróntase a un Céltiga que chega cunha boa dinámica.
-
Os branquiazuis queren manter o liderado unha xornada máis.
Santiago de Compostela, a 16 de Marzo de 2018.
A parroquia branquiazul volverá á vivir un novo partido matinal. Esta vez, debido a que o partido será emitido pola TVG2, San Lázaro abrirá as súas portas para que ás 12.00 horas se viva un emocionante duelo entre o líder, a SD Compostela, e un Céltiga FC que, a pesar de estar na zona quente da táboa, chega cunha gran dinámica.
No encontro do domingo, o Compos tentará repetir o resultado da primeira volta, na que os nosos levaron o triunfo por cinco a cero, pero desde o corpo técnico non se fían e saben que a batalla será complicada.
“É un partido moi difícil, contra un equipo que vén de gañar ao Boiro e Villalbés, cun potencial enorme en canto a xogadores, contrastados moitos na categoría, e que están a pelexar por saír de aí abaixo”, analizou Yago Iglesias en rolda de prensa.
O técnico branquiazul destacou do seu rival a calidade do seu plantel a cal, “a pesar de non render na primeira volta como esperaban, agora si que teñen ese nivel e seguro que nolo poñen difícil, co plus de enfrontarse ao líder e en San Lázaro, por unha banda, e porque o encontro é televisado, pola outra”.
No que respecta a este último aspecto, aínda que obrigue a xogar de mañá, Yago considérao positivo para o club, xa que “nos permite ser máis publicitarios”. Con todo, espera e desexa que “veña a xente que acode habitualmente e que nos apoie como sempre, porque sería fantástico acabar a xornada matinal con catro puntos de vantaxe sobre o segundo, o que lle metería algo de presión”.
A vitoria sería todo un golpe de moral para un conxunto que non se fía do seu calendario, xa que cada partido e cada semana é un mundo, segundo apunta o adestrador. Coas baixas de Tomás e Cardeñosa por sanción, tentarán que os tres puntos queden na casa.
Os branquiazuis queren manter a gran dinámica das mañás e contentar a unha afección que poderá gozar despois das uñas de San Lázaro. Buscamos un combo perfecto para unha nova xornada matinal.
