Santiago de Compostela, a 26 de Abril de 2018.
Este venres, o Hotel Oca Porta do Camiño, acollerá a partir das 19.00 horas unha cita especial para as categorías inferiores da SD Compostela. Todos os xogadores da base branquiazul asistirán a un evento realizado a medida para eles, que será presentado por Silvia Castiñeiras, xornalista de Correo Tv.
No acto, no que participarán Javier Puñal, como director de marketing do club, Víctor Pazos, como novo responsable da canteira, e Antonio Quinteiro, como presidente da entidade, os nenos e mozos recibirán diferentes premios, participarán en sorteos e acabarán cunha comida final nunha das salas do hotel.
Ademais, tamén estarán presentes un responsable de cada empresa patrocinadora dos conxuntos da base, así como xogadores do primeiro equipo, cada un padriño dun dos conxuntos.
En canto aos premios, un xogador de cada equipo recibirá unha mención especial por ser o mellor compañeiro. Este galardón recibirano despois de que o votasen os membros do seu conxunto.
